ਵਰਿੰਦਰ ਸਿੰਘ ਔਲਖ ਫ਼ਰੀਦਕੋਟ ਜ਼ਿਲ੍ਹੇ ਦੇ ਪਿੰਡ ਔਲਖ ਦਾ ਜੰਮ ਪਲ ਹੈ। ਪਿਤਾ ਸ. ਸੁਖਮੰਦਰ ਸਿੰਘ ਦੇ ਘਰ ਮਾਤਾ ਬਲਜੀਤ ਕੌਰ ਦੀ ਕੁਖੋਂ ਉਸ ਨੇ 30 ਮਾਰਚ 1997 ਨੂੰ ਜਨਮ ਲਿਆ।
ਪਿੰਡ ਦੇ ਸਰਕਾਰੀ ਹਾਈ ਸਕੂਲ ਔਲਖ ਤੋਂ 10 ਵੀਂ ਦੀ ਪੜ੍ਹਾਈ ਕੀਤੀ ਇਸ ਤੋਂ ਬਾਅਦ ਕੋਟਕਪੂਰਾ ਦੇ ਡਾ. ਚੰਦਾ ਸਿੰਘ ਮਰਵਾਹ ਸਰਕਾਰੀ ਸੀਨੀਅਰ ਸਕੈਂਡਰੀ ਸਕੂਲ ਤੋਂ 12 ਵੀ ਜਮਾਤ ਪਾਸ ਕੀਤੀ ਅਤੇ ਡਿਸਟੈਂਸ ਐਜੂਕੇਸ਼ਨ ਰਾਹੀਂ ਬੀ. ਏ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ ਫਗਵਾੜਾ ਤੋਂ ਕੀਤੀ। ਇਸ ਦੇ ਨਾਲ ਨਾਲ ਉਸ ਨੇ ਸਿਨੇਮਾ ਵਿੱਚ ਕੰਮ ਵੀ ਕੀਤਾ ਏਸੇ ਦੌਰਾਨ ਹੀ ਕਿਤਾਬਾਂ ਪੜ੍ਹਨ ਦਾ ਸ਼ੌਕ ਬਹੁਤ ਜਿਆਦਾ ਪੈ ਗਿਆ।
ਸਭ ਤੋਂ ਪਹਿਲਾਂ “ਫਿਲਮ ਵਾਰਤਾ” ਚੈਨਲ ਤੋਂ ਪੱਤਰਕਾਰੀ ਦਾ ਸਫਰ ਸ਼ੁਰੂ ਹੋਇਆ ਬਹੁਤ ਕੰਮ ਕੈਮਰੇ ਦੇ ਪਿੱਛੇ ਰਹਿ ਕੇ ਕੀਤਾ। ਕੈਨੇਡਾ ਤੋਂ ਰੇਡੀਓ ਜੀਟੀ ਰੋਡ ਐਫ ਐਮ ਤੋਂ ਕੰਮ ਕਰਦਿਆਂ ਕਈ ਵੱਡੇ ਸਿਆਸੀ ਚਿਹਰਿਆਂ ਦੀ ਇੰਟਰਵਿਊ ਦਾ ਮੌਕਾ ਮਿਲਿਆ। ਉਸ ਦਾ ਲਿਖਿਆ ਕਬਿੱਤ ਛੰਦ ਸੋਸ਼ਲ ਮੀਡੀਆ ਤੇ ਵਾਇਰਲ ਹੋਣ ਨਾਲ ਬਹੁਤੇ ਚੈਨਲਜ਼ ਨੇ ਉਸ ਦੀਆਂ ਇੰਟਰਵਿਊਜ਼ ਕੀਤੀਆਂ ਜਿਸ ਨਾਲ ਆਮ ਲੋਕਾਂ ਵਿੱਚ ਵਿਸ਼ੇਸ਼ ਪਹਿਚਾਣ ਬਣੀ।
ਹੁਣ ਉਸ ਨੇ ਪੱਤਰਕਾਰੀ ਦਾ ਕੰਮ ਘਟਾ ਕੇ ਸਿਰਫ ਸ਼ਾਇਰੀ ਤੇ ਫੋਕਸ ਕੀਤਾ ਹੈ। ਘਰ ਚਲਾਉਣ ਲਈ ਸਿਨਮੇ ਵਿੱਚ ਮੈਨੇਜਰ ਰਹਿਣ, ਸਵਿੱਗੀ ਕੰਪਨੀ ਵਿੱਚ ਡਲਿਵਰੀ ਮੈਨ ਦਾ ਕੰਮ ਕਰਨ ਤੋਂ ਇਲਾਵਾ ਉਸ ਕੋਰੀਅਰ ਸੇਵਾ ਵਿੱਚ ਵੀ ਰੁਜ਼ਗਾਰ ਕਮਾਇਆ ਹੈ।
ਫਿਲਹਾਲ ਆਪਣੇ ਪਿੰਡ ਵਿੱਚ ਸਹਿਕਾਰੀ ਸਭਾ ਵਿੱਚ ਸੈਕਟਰੀ ਦੀ ਪੋਸਟ ਤੇ ਕੰਮ ਕਰ ਰਿਹਾ ਹੈ। ਉਸ ਦੀ ਕਾਵਿ ਰਚਨਾ ਵੀ ਨੇੜ ਭਵਿੱਖ ਵਿੱਚ ਪ੍ਰਕਾਸ਼ਿਤ ਹੋ ਰਹੀ ਹੈ। - ਗੁਰਭਜਨ ਗਿੱਲ।
