ਨੀਲੂ ਜਰਮਨੀ ਲੰਬੇ ਸਮੇਂ ਤੋਂ ਪਰਿਵਾਰ ਸਮੇਤ ਜਰਮਨੀ ਵਿੱਚ ਰਹਿ ਰਹੀ ਹੈ । ਨੀਲੂ ਜਰਮਨੀ ਦੀ ਪਹਿਲੀ ਕਾਵਿ ਪੁਸਤਕ “ਬੈਰਾਗ” 2021 ਵਿੱਚ ਚੇਤਨਾ ਪ੍ਰਕਾਸ਼ਨ ਲੁਧਿਆਣਾ ਵੱਲੋਂ ਪ੍ਰਕਾਸ਼ਿਤ ਹੋਈ ।
ਨੀਲੂ ਦਾ ਪਸੰਦੀਦਾ ਸ਼ਾਇਰ ਸ਼ਿਵ ਕੁਮਾਰ ਬਟਾਲਵੀ ਹੈ ਜਿਸ ਦਾ ਅਸਰ ਉਹਦੇ ਬੋਲਾਂ ਵਿੱਚੋਂ ਪ੍ਰਤੱਖ ਝਲਕਦਾ ਹੈ । ਨੀਲੂ ਨੇ ਆਪਣਾ ਮੌਲਿਕ ਅੰਦਾਜ਼ ਵੀ ਸਿਰਜਿਆ ਹੈ, ਜਿਸ ਵਿੱਚ ਲੋਕ ਧਾਰਾ ਦਾ ਵਹਿਣ ਨਾਲੋ-ਨਾਲ ਨਿਰੰਤਰ ਵਹਿੰਦਾ ਹੈ ।
2023 ਵਿੱਚ ਉਸ ਦਾ ਸੱਜਰਾ ਗ਼ਜ਼ਲ ਸੰਗ੍ਰਹਿ “ਪਰਛਾਵਿਆਂ ਦੀ ਡਾਰ” ਕੈਲੀਬਰ ਪਬਲੀਕੇਸ਼ਨ ਵੱਲੋਂ ਪ੍ਰਕਾਸ਼ਿਤ ਕੀਤਾ ਗਿਆ ਹੈ । ਇਸ ਵਿੱਚ ਉਹ ਬੈਰਾਗ ਤੋਂ ਅਗਲੇ ਪੰਧ ਤੇ ਹੈ ।
ਯੋਰਪੀਨ ਲੇਖਕ ਭਾਈਚਾਰੇ ਵਿੱਚ ਨੀਲੂ ਸਤਿਕਾਰਤ ਮੁਕਾਮ ਰੱਖਦੀ ਹੈ ।
ਨੀਲੂ ਦੀ ਸ਼ਾਇਰੀ ਵਿੱਚ ਮੁਹੱਬਤ ਦੀ ਸਰਦਾਰੀ ਹੈ । ਇਹ ਮੁਹੱਬਤ ਵਿਕਅਤੀ ਵਿਸ਼ੇਸ਼ ਜਾਂ ਰਿਸ਼ਤਿਆਂ ਨੂੰ ਹੀ ਨਹੀਂ ਸਗੋਂ ਸਮੁੱਚੀ ਲੋਕਾਈ ਨਾਲ਼ ਹੈ । ਬੈਰਾਗ ਤੋਂ ਅਨੁਰਾਗ ਰਾਹੀ ਲੰਘਦਿਆਂ ਉਹ ਲੋਕ ਰਾਗ ਤੀਕ ਅੱਪੜੀ ਹੈ । ਉਸ ਦੇ ਸਾਬਤ ਕਦਮਾਂ ਦਾ ਪਾਠਕ ਚੰਗਾ ਹੁੰਗਾਰਾ ਭਰ ਰਹੇ ਹਨ , ਮੇਰੇ ਸਮੇਤ ।
-ਗੁਰਭਜਨ ਗਿੱਲ
