Abid Jafri عابد جعفری
عابد جعفری جی دا جنم 1934 وچ علاقہ دھن کہون دے شہر چکوال دے ہک قصبے منگوال چ ہویا ۔ اوہناں دا اصل ناں اللہ داد خاں سی ۔ اوہ اردو دے ہک مشہورتے منّے پرمنّے استاد شاعر سن ہک سُچل فقیر تے درویش جنہاں کولوں کئی شاعراں ، عام لوکاں تے لیکھکاں نیں فیض حاصل کیتا اج وی دھن دے لوک اوہناں نوں بہوں عزت تے احترام نال یاد کردے نیں ۔ اوہناں دے دوستاں وچ نامور شاعر احسان اکبر ، اختر امام رضوی ، سید منظور حیدر ، ماجد صدیقی ، وغیرہ شامل رہے پر اوہناں آپ کدی وڈے شہراں دا رخ نئیں کیتا ہاں پر راول پنڈی ، اسلام آباد دے ادبی حلقے اوہناں نوں جانڑدے سن کئی وڈے مشاعریاں دی صدارت وی کیتی ، ایوارڈز نال وی نوازیا جاندا رہیا۔2 اردو کتاباں تے 1 پنجابی دی کتاب “ گئے گواچے سُکھ “ اوہناں دی حیاتی چ چھپی ۔چڑھدے پنجاب ول گُرمکھی چ وی نظماں چھپدیاں رہیاں ۔ 2017 وچ ظفر اقبال ہوراں نیں “عابد جعفری بطور غزل گو “ دے سرنانویں نال پروفیسر کامران کاظمی دی نگرانی وچ ایم فل دا تھیسز علامہ اقبال اوپن یونیورسٹی اسلام آباد چوں مکمل کیتا ۔ کافی کلام غیر مطبوعہ اے تے کلیات دا کم جاری اے ۔اپریل 2014 وچ اس فانی جہان تو رخصت ہوئے تے اپنے پنڈ منگوال وچ دفن نیں ۔
