توقیر رضا — Tauqir Reza

توقیر رضا دا جنم 4 اپریل 1988 نوں چکوال، لہندے پنجاب چ ہویا۔ انہاں دے پِنڈ دا ناں مرید اے۔ ایہ علاقہ دھن کہون کہلاندا اے بابا پیلو جنہاں مرزا صاحباں لکھی او وی اسے علاقے دے سن۔ ہندوستان دے پردھان منتری منموہن سنگھ وی چکوال دے ہک پنڈ “گاہ“ وچ جمے سن۔ اس علاقے دے لہجے نوں دھنی آکھدے نیں۔

توقیر رضا میٹرک چکوال چوں تے انٹرمیڈیٹ اسلام آباد توں کیتا۔ اودوں بعد پڑھائی تے روزگار کیتے لندن ٹُرگئے، تے کجھ ورہیاں تو فرانس دے وسنیک نیں۔ 2006 توں لکھن دی شروعات کیتی۔ توقیر رضا پنجابی تے اردو دوہواں بولیاں چ غزل، ازاد نظم، تے نثری نظم لکھدے نیں۔ انہاں دی کتاب “چن دی مٹی“ دے ناں نال سال 2022 وچ سانجھ پبلیکیشنز لاہور تو چھاپے چڑھی۔ اردو نظماں دی کتاب “موتیے کے نابینا پھول“ مطلب موتیے دے انھّے پُھل چھاپے خانے چ اے جلدی چھپ جاوے گی۔ توقیر رضا نیں 2023 وچ مشہور کَوی “قابل جعفری“ ہوراں دی کتاب “اپار“ سودھی جسدا گُرمکھی اُتارا وی ہو چکیا اے اتے اوہ اج کل استاد عابد جعفری ہوراں دی پنجابی شاعری وی جوڑ رہے نیں۔ اوس تو علاوہ انہاں دیاں کویتاواں چڑھدے پنجاب تے لہندے پنجاب وچ وی چھپدیاں رہندیاں نیں۔