سیہرفی فرد فقیر
سیہرفی
الف-اﷲ بن غافلا پھریوں سارا جگّ،
راہ بھلائیوئی حق دا دنیا پچھے لگّ،
دنیا کوڑی چار دن راہ شرع دا بھال،
فردا، لیکھا لیسیا ربّ قادر جل جلال ۔
بے-بدیاں کردیاں دن گیا سوں ونجھائی رات،
غافل اک دن آوسی کاٹھ کہاڑی وات،
دولت دنیا مال زر کجھ نہ ویسی نال،
فردا، لیکھا لیسیا ربّ قادر جل جلال ۔
تے-طوبہ دل تھیں نہ کریں کریں زبانی نت،
تسبیح رکھیں مکر دی پھاہی تے دھر چتّ،
باہر بانا صوفیاں اندر دغا کمال،
فردا، لیکھا لیسیا ربّ قادر جل جلال ۔
سے-ثابت دل تھیں نہ رہیں اکی دے ولّ لگّ،
در در پھرنا ایں بھونکدا بونڈے لگی اگّ،
اؤراں مندا کیوں کہیں اپنا آپ سمھال،
فردا، لیکھا لیسیا ربّ قادر جل جلال ۔
جیم-جوانی چار دن متّ ہوویں مغرور،
پیر پیغمبر اولیا سبھ موت لنگھائے پور،
بھٹھّ اوہناں دا جیونا اٹھے پہر جنجال،
فردا، لیکھا لیسیا ربّ قادر جل جلال ۔
ہے-حق حلال پچھان توں نہ کر اتنا زور،
توں کیوں ستائیں غافلا تینوں کھلھی اڈیکے گور،
توں جا اندھیرے لیٹنا کوئی نہ پچھے حالَ،
فردا، لیکھا لیسیا ربّ قادر جل جلال ۔
خے-خوشیاں کر توں شادیاں بیٹھوں مجلس لا،
کتے نفس پلید دی منی تدھُ رضا،
عمر گنوائی غفلتے سمبھل لجّ سنبھال،
فردا، لیکھا لیسیا ربّ قادر جل جلال ۔
دال-دلا ہشیار ہو باطن اکھیں کھولھ،
چنگا چاہیں جے ہویا مندا کسے نہ بول،
ڈٹھو ای شیطان دا ہویا کی احوال،
فردا، لیکھا لیسیا ربّ قادر جل جلال ۔
زال-ذکر خدائے دا نہ کر ظاہر خلق دکھا،
اندر کر توں بندگی باہر پردہ پا،
مل نہ ویچیں علم نوں نہ کریں سوال،
فردا، لیکھا لیسیا ربّ قادر جل جلال ۔
رے-راضی کر توں ربّ نوں روزہ حج زکوٰۃ،
کلمہ طیب آکھنا پنجے وقت صلوٰة،
کرنی ترک حرام تھیں کھاون ڈھونڈ حلال،
فردا، لیکھا لیسیا ربّ قادر جل جلال ۔
زے-زر اکٹھا کر کے اوہ کردے زر دا مان،
دندے نہ نمانیاں مردے پچھوتان،
آخر روسن زار زار ہو سن مندے حالَ،
فردا، لیکھا لیسیا ربّ قادر جل جلال ۔
سین-سنائیں خلق نوں کر کر مصلے روز،
لوکاں دیں نصیحتاں اندر تیرے چور،
کی ہویا جے لدیا گدھا کتاباں نال،
فردا، لیکھا لیسیا ربّ قادر جل جلال ۔
شین-شامت نفس توں ہردم کریں گناہ،
آپوں راہ نہ آؤندا لوکاں دسیں راہ،
دسن صورتَ دوستاں دشمن وڈے کمال،
فردا، لیکھا لیسیا ربّ قادر جل جلال ۔
سواد-صبوری آکلاں کیتی بہت پسند،
ہور نہ سکھ نصیحتاں اکو ایہا پند،
حرص ہوائیں چھوڑ دے سن دل دیاں کناں نال،
فردا، لیکھا لیسیا ربّ قادر جل جلال ۔
ضواد-ضروری چلنا اتھے ناہیں جا،
پنج دہاڑے جیونا بیٹھوں محل بنا،
بھٹھّ پئیاں ایہہ عمارتاں چھڈّ دے وہم خیال،
فردا، لیکھا لیسیا ربّ قادر جل جلال ۔
توئے-طاقت ناہیں عدل دی کریں کریماں فضل،
توشہ ناہیں راہ دا سر تے بھاری مزل،
باجھ شفاعت مستفے چھٹن بڑا محال،
فردا،لیکھا لیسیا ربّ قادر جل جلال ۔
زوئے-ظلم کریندے خلق تے جہناں موت نہ یاد،
دندے نہ نمانیاں نہ اوہ ہوون شاد،
جہناں خوف نہ ربّ دا خوف تیہاں تھیں بھال،
فردا، لیکھا لیسیا ربّ قادر جل جلال ۔
این-عبادت ربّ دی اندر بہہ کے کر،
کیہا نفس شیطان دا دل تے مول نہ دھر،
رکھیں نظر حلال تے نہ کھا پرایا مال،
فردا، لیکھا لیسیا ربّ قادر جل جلال ۔
غین-غرورت نہ کرو روؤ ڈھائیں مار،
باجھوں عملاں چنگیاں کون لنگھاسی پار،
چھڈّ دنیا دے وعدے قول خدا دا بھال،
فردا، لیکھا لیسیا ربّ قادر جل جلال ۔
فے-فرد فقیرا گودڑی بیٹھوں گل وچ پا،
سر ٹوپی گلّ سہلیاں ٹھگاں ویس بنا،
غصہ نفس نہ ماریو پھدھوئی جھوٹھا حالَ،
فردا،لیکھا لیسیا ربّ قادر جل جلال ۔
قاف-قنات جو کرے ذوق رزق ہمیش،
تقویٰ دولت لے بہے تاں تھیوے درویش،
پکڑیں ترک حرام تھیں کھاویں ڈھونڈ حلال،
فردا، لیکھا لیسیا ربّ قادر جل جلال ۔
قاف-کلام خدائے دی ملاں پڑھن فقیر،
بولن جھوٹھ تے کھان حرام کیہ ہووے تاثیر،
نام دھراؤن شیخ جی ٹرن اولی چال،
فردا،لیکھا لیسیا ربّ قادر جل جلال ۔
لام-لکھاں پڑھدے آدمی ڈنگراں وانگ قرآن،
کھاون کیوں حرام نوں حق پرایا جان،
تسبیح خرقہ مکر دا اگے اندر جال،
فردا، لیکھا لیسیا ربّ قادر جل جلال ۔
میم-میموں مل وکانودی اج فقیری ہٹّ،
اک پیسے دی انّ لے گلّ نوں سیہلی وٹّ،
گری رنگ لے کپڑے کھولھ سرے دے وال،
فردا، لیکھا لیسیا ربّ قادر جل جلال ۔
نون-نمازاں کی پڑھو، نہ کرو رکوا سجود،
ظاہر کھڑھا نماز وچ اندر ہور غدود،
متھے پا محراب نوں اندر دغا کمال،
فردا، لیکھا لیسیا ربّ قادر جل جلال ۔
واؤ-واری جاواں تہناں تھوں جہڑے پیر سدان،
ہتھ وچ لیندے مور-چھڑر پھردے وچ جہان،
وانگوں شیطان خلق نوں رانن گلاں نال،
فردا، لیکھا لیسیا ربّ قادر جل جلال ۔
ہے-ہدایت ربّ دی جہناں ہوئی آ،
کرن عبادت بندگی دنیا دلوں بھلا،
رکھن نظر حلال تے نہ تکن پرایا مال،
فردا، لیکھا لیسیا ربّ قادر جل جلال ۔
لام-لاموں لعنت کافراں ہور کراڑاں دیہہ،
نالے پچھوں ظالماں تریہاں دے سر کھیہہ،
غیبت خدی تکبری ایماں کرن زوال،
فردا، لیکھا لیسیا ربّ قادر جل جلال ۔
الف-اولے راہ تے نہ کر ذرا خیال،
چھڈّ دنیا دیاں کاراں سدھا راہ سمھال،
سدھے راہ تے جو چلے سوئی جان نہال،
فردا، لیکھا لیسیا ربّ قادر جل جلال ۔
یہ-یاری کر توں ربّ دی ہور یار دنی دے کوڑ،
من محمد مصطفیٰ لنگھیں پہلے پور،
چہناں یاراں دی دوستی منّ نبی دی آل،
فردا، لیکھا لیسیا ربّ قادر جل جلال ۔
