پنجابی کافیاں سادھو دھیان سنگھ عارف
1. میری میری نہ کر غافل
میری میری نہ کر غافل
ایہہ دھن جان پرایا ای ۔
سائیں وسار کے دنیاں اندر
سر توں خوف بھلایا ای ۔
سکھ انند چھوڈ کے آپے
پیر دکھاں وچّ پایا ای ۔
ہونجھ پاپ دا کلر کوڑا
ہتھوں لال گوایا ای ۔
بھے بھنجن سکھ ساگر سرور
کیوں من سیوں بسرایا ای ۔
پنج اچکیاں رل مل تینوں
پا لیا اپر سایہ ای ۔
موہ مایہ نہ وچوں کڈھیں
نام فقیر دھرایا ای ۔
چٹی چادر سنتاں والی
داغ سیاہی لایا ای ۔
رنگ دویش جس میل ن دھوتی
آخر اوہ پچھتایا ای ۔
شاہ غریب سبھ اکو تھاں تے
مٹی وچّ سمایا ای ۔
چھڈکے محل منارے سبھناں
کوٹھا گور بنایا ای ۔
وارو وٹی ہر اک تائیں
موت کسین دبایا ای ۔
وانگ پتاسے بندہ بنیا
بہت ویر ازمایا ای ۔
تیرے نالوں ڈنگر چنگے
جنہاں ددھ پلایا ای ۔
جنہاں من دا کشتہ کیتا
اوہناں رنگ اڈایا ای ۔
ست سنتوکھ نہ دھاریں اندر
اگنی وانگ تپایا ای ۔
لد گئے ونجارے لکھاں
کسے نہ انت چھڈایا ای ۔
کارو چھڈ خزانے سبھے
ننگے ہتھ سدھایا ای ۔
حسن جوانی جان پرانی
جیوں بادر کی چھایا ای ۔
اس نے پا لئی فتح جہانوں
جس نے نام دھیایا ای ۔
دھیان سنگھا پڑھ ہرِ ہرِ منتر
حکم حضوروں آیا ای ۔
2. وچ سورگ دے موجاں مانے
وچ سورگ دے موجاں مانے
جیڑا جنم سوار گیا ۔
پر سیت گھر گیا خصم دے
نالے سنگی تار گیا ۔
تمھے جھوٹھ دے سر پے جانوں
ڈار بھاٹھ کی چھار گیا ۔
ہو نرمان گیا جگ اتے
سٹ خودی دا بھار گیا ۔
زندہ مرکے پھندوں چھٹا
من پاپی نوں مار گیا ۔
بیج بیج کے امرت مٹھا
دکھ تسیہے ٹار گیا ۔
پی کے جام حیاتی جگ جگ
سچے سیوں کر پیار گیا ۔
ہو نرلیپ کمل پھل وانگوں
سبھ کجھ گر توں وار گیا ۔
دل اپنے وچ عکس جما کر
نقشہ کھچ مرار گیا ۔
دھیان سنگھا کڈھ سنسا وچوں
ہر ہر نام چتار گیا ۔
3. وچّ گربھ دے پٹھا ہو کے
وچّ گربھ دے پٹھا ہو کے
سو سو ترلا پایا سی ۔
ستگور باجھوں سندا کوئی نہ
رو رو حالَ ونجایا سی ۔
بھاری دکھ تسیہے وچوں
ستگور آن چھڈایا سی ۔
دینا ناتھ، ناتھ بن تیرا
کس نے دکھ مٹایا سی ۔
ایسا دکھ مٹاون دے لئی
ہر ہر نام دھیایا سی ۔
پون روپ ہر بانا دھرکے
وچے رزق پچایا سی ۔
پھر پھر جوناں ہور انیکاں
جنم سببی آیا سی ۔
دھیان سنگھ پھس دھندے اندر
ہر دا نام بھلایا سی ۔
4. جس پاپی نے جنم ہاریا
جس پاپی نے جنم ہاریا
ہو کر بہت لاچار گیا ۔
میری میری رہا سناندا
ہر دا ورد وسار گیا ۔
انت چھوڑ کے دھری دھرائی
کوڑی کھیڈ کھڈار گیا ۔
موہلت پنی بھیا نراسا
روندا زارو زار گیا ۔
پورے گر کی سیوا تج کے
کوڑ پسار پسار گیا ۔
ہتھ کسے دے کچھو نہ آیا
روندا سبھ سنسار گیا ۔
اوتھوں مڑ کے کوئی نہ آیا
اتھوں لکھ ہزار گیا ۔
موجاں لیندے سو سہجی والے
نرکاں وچّ گوار گیا ۔
بھوجل دے وچّ غوطے کھاندا
نہ اوہ پار ارار گیا ۔
دھیان سنگھا نہیں کتے وی ڈھوئی
سچے جاں دربار گیا ۔
5. ڈھونڈ نہ باہروں وچے تیرے
ڈھونڈ نہ باہروں وچے تیرے
پیا امولک مال منا ۔
بھیتر پھول پٹاری وچوں
سندر دمکے لال منا ۔
سبھ خلقت دا مالک تونہیں
مہاں کالکا کال منا ۔
ادے است تے ون ترن پربت
تیرا گگن پتال منا ۔
چارے چک جگیرے تیرے
چھڈ دویش خیال منا ۔
انتر جوتی جوت الیکھنگ
جگّ مگّ جگے مثال منا ۔
پھوک مواتا جال غلامی
گیان بسنتر بال منا ۔
دھیان سنگھ توہے دکھ نہ لاگے
بھج لے نام گوپال منا ۔
| |
