ظالم عشقَ بے درد کہاوے ۔
جس نوں لگے مار ونجاوے ۔
باجھوں یار قرار نہ آوے۔
دوجی ویری خلقت ساری ۔
عشقے اندر بہت خواری ۔1۔

جب چل آوے عشقَ بدن میں ۔
آوے چین نہ چوک چمن میں ۔
روندے پھردے عاشق بن میں ۔
لگی جنہاں نوں پریم کٹاری ۔
عشقے اندر بہت خواری ۔2۔

نہیں دیوے دلبر درشن ۔
عاشق مکھ دیکھن نوں ترسن ۔
بن دلبر دے آنکھی برسن ۔
ساون برسے جیوں گھٹ کاری۔
عشقے اندر بہت خواری ۔3۔

زہر پیالے عشقے والے ۔
عاشق پی ہوون متوالے ۔
دیکھ پتنگ شماں نے جالے ۔
مر گئے صورتَ دیکھ پیاری ۔
عشقے اندر بہت خواری ۔4۔

جس دے دل وچّ عشقَ سماوے ۔
اس دا عیش آرام اٹھاوے ۔
جانی باجھ چلی جند جاوے ۔
تن من خاک کرے اک واری۔
عشقے اندر بہت خواری ۔5۔

عشقے سسی مار گوائی ۔
پنوں دیندا پھرے دہائی ۔
مجنوں دے تن دبھ اگائی ۔
موئی لیلی ویکھ وچاری ۔
عشقے اندر بہت خواری ۔6۔

عشقے مرزا مار گوایا ۔
جب صاحباں سے انگ ملایا ۔
مہینوال فقیر بنایا ۔
مر گئی سوہنی لا جل تاری ۔
عشقے اندر بہت خواری ۔7۔

رانجھا ہیر عشقَ نے مارے ۔
شیریں تے فرہاد وچارے ۔
چندر بدن مانہہ یار پیارے ۔
شاہ شمس دی کھلّ اتاری ۔
عشقے اندر بہت خواری ۔8۔

منصورے نوں دار چڑھایا ۔
حسن حسین کٹک کھپایا ۔
بلھے تائیں عشقَ ستایا ۔
زکریا چیر دیا دھر عاری ۔
عشقے اندر بہت خواری ۔9۔

عشقے پیر فقیر رنجانے ۔
پھرن اجاڑیں ہوئے دیوانے ۔
جس نوں لگی ووہی جانے ۔
عشقَ رنجانی خلقت ساری ۔
عشقے اندر بہت خواری ۔10۔

عشقَ جنہاں تن چوٹاں لائیاں ۔
رو رو ہر دم دین دہائیاں ۔
آ مل پیارے آ مل سائیاں ۔
تیری صورتَ پر بلہاری ۔
عشقے اندر بہت خواری ۔11۔

جس دے پاس نہیں دل جانی ۔
تلخ اس دی ہے زندگانی ۔
جیوں مچھلی ترپھے بن پانی ۔
تیسے دلبر باجھ لچاری ۔
عشقے اندر بہت خواری ۔12۔

عشقَ ولی اوتار ڈلائے ۔
بھر بھر پور ہزار ڈبائے ۔
عشقَ اپائے عشقَ کھپائے ۔
عشقے منے سبھ نر ناری ۔
عشقے اندر بہت خواری ۔13۔

ویکھ پتنگ شمع پر سڑدے ۔
عاشق جائ سولیاں چڑھدے ۔
تاں بھی یار یار ہی کردے ۔
ایس عشقَ دی چال نیاری ۔
عشقے اندر بہت خواری ۔14۔

برہوں والے بدل کڑکن ۔
عاشق گھائل مرغ جیوں پھڑکن ۔
بھور پھلوں پر ہر دم لٹکن ۔
سبھ سو مشکل کرنی یاری ۔
عشقے اندر بہت خواری ۔15۔

عاشق دے دشمن ہزاراں ۔
چاروں طرف ننگی تلواراں ۔
پچھو جا کے عشقَ بیماراں ۔
کھونّ چشم سو کر رہے زاری ۔
عشقے اندر بہت خواری ۔16۔

عاشق گھائل ہوئے وچّ رن دے ۔
رتی رت نہیں وچّ تن دے ۔
من دی بات رہے وچّ من دے ۔
کس نوں کہاں حقیقت ساری ۔
عشقے اندر بہت خواری ۔17۔

ایس عشقَ دے سبھ پسارے ۔
عشقَ اپائے عشقے مارے ۔
عشقَ دے چوداں طبق پیارے ۔
عشقے پر عاشق جند واری ۔
عشقے اندر بہت خواری ۔18۔

وچّ قرآن لفظ اک آیا ۔
مولٰی کنّ جدوں فرمایا ۔
ایہہ عشقے چوداں طبق بنایا ۔
اس عشقَ دی کھیل مداری ۔
عشقے اندر بہت خواری ۔19۔

پال سنگھ ہن کی کجھ کہیئے ۔
واحد سمجھ چپ ہو رہیئے ۔
دل وچّ دلبر نوں مل رہیئے ۔
جس دی قدرت بیشماری ۔
عشقے اندر بہت خواری ۔20۔

آ مل پیارے آ دیہہ درشن ۔
اس درشن نوں اکھیاں ترسن ۔
چھم چھم وانگ گھٹا دے برسن ۔
رو رو چھہبر خوب لگائی ۔
مرن بھلا ہے بری جدائی ۔1۔

مہر کریں پاویں اک پھیری ۔
میں موہی ہاں صورتَ تیری ۔
تدھ بن آئے غماں نے گھیری ۔
ہے ہن جان لباں پر آئی ۔
مرن بھلا ہے بری جدائی ۔2۔

کتھوں ڈھونڈھاں کدھر جاواں ۔
کس نوں دل دا حالَ سناواں ۔
ہے ہے کر کے وکھت لنگھاواں ۔
ڈاڈھا دکھ نہ کوئی دوائی ۔
مرن بھلا ہے بری جدائی ۔3۔

تیرے کارن طعنے مارن ۔
جلی بلی نوں مڑ مڑ جارن ۔
دوتی دشمن کھل اتارن ۔
ویری ہوئی سبھ لکائی ۔
مرن بھلا ہے بری جدائی ۔4۔

تدھ بن ہوئی میں مستانی ۔
کردی پھردی جانی جانی ۔
لا گؤں وچّ جگر دے کانی ۔
مڑ کے سار نہ لئیؤ کائی ۔
مرن بھلا ہے بری جدائی ۔5۔

ہے بے دردی درد نہ آیا ۔
خونی تیر جگر وچّ لایا ۔
ہوش عقل جہان بھلایا ۔
میرا درد نہ کیتو رائی ۔
مرن بھلا ہے بری جدائی ۔6۔

کوئی دسے دلبر میرا ۔
جس نے دل وچ کیتا ڈیرہ ۔
چین نہ تس بن سنجھ سویرا ۔
کت ول دیواں جاہِ دہائی ۔
مرن بھلا ہے بری جدائی ۔7۔

اس چھلہارے کر چھل چھلیاں ۔
روندی پھری میں وچّ گلیاں ۔
برہوں آتش دے وچّ بلیاں ۔
چکھا وچھوڑے پکڑ جھڑائی ۔
مرن بھلا ہے بری جدائی ۔8۔

سبھ زمانہ کھیلے ہسے ۔
میرا یار نہ کوئی دسے ۔
اوہ ہن کیہڑیں دیسیں وسے ۔
جس دی صورتَ ہوش بھلائی ۔
مرن بھلا ہے بری جدائی ۔9۔

جاں سائیاں اوہ سائیں آوے ۔
نہیں تاں جند نکل کے جاوے ۔
جو کوئی میرا یار ملاوے ۔
اس اتوں میں گھول گھمائی ۔
مرن بھلا ہے بری جدائی ۔10۔

ہو جوگن جنگل وچّ جاواں ۔
گل وچّ جلفاں ویس وٹاواں ۔
جا سوہنے نوں ڈھونڈھ لیاواں ۔
جس نے چوٹ جگر وچّ لائی ۔
مرن بھلا ہے بری جدائی ۔11۔

پؤئے پہر چپی ہتھ پھڑساں ۔
ہو بیراگن بن وچّ وڑساں ۔
برہوں آتش اندر سڑساں ۔
جے نہ جانی دے دکھائی ۔
مرن بھلا ہے بری جدائی ۔12۔

سئیؤ چرخے چائ اٹھاوو ۔
گھر باہر نوں اگ لگاوو ۔
ایکو گیت سجن دے گاوو ۔
جس بن جھوٹھی سبھ لکائی ۔
مرن بھلا ہے بری جدائی ۔13۔

کوٹھے تے چڑھ دیاں دہائیاں ۔
آ مل پیارے آ مل سائیاں ۔
توں میرے من کیہیاں لائیاں ۔
کملی شکل بے ہوش بنائی ۔
مرن بھلا ہے بری جدائی ۔14۔

تیرا عشقَ جاں تن میں آیا ۔
ساک انگ دا سنگ چھڈایا ۔
ویری سبھ جہان بنایا ۔
نہ کوئی بھین نہ بابل مائی ۔
مرن بھلا ہے بری جدائی ۔15۔

گھر وچّ لوک سکھی سبھ سؤندے ۔
عاشق پھرن اجاڑیں بھؤندے ۔
ہر دم سل جگر وچّ پؤندے ۔
تن من والی ہوش ن کائی ۔
مرن بھلا ہے بری جدائی ۔16۔

آ مل پیارے نہ کر اڑیاں ۔
راہ اڈیکاں ہر دم کھڑیاں ۔
رو رو نین لگا رہے جھڑیاں ۔
ساون جیوں کالی گھٹ آئی ۔
مرن بھلا ہے بری جدائی ۔17۔

میرے دل دی میں ہی جانا ۔
کملی آکھے سبھ زمانہ ۔
دیوے پر جلیا پروانہ ۔
تؤں توں میری جان جلائی ۔
مرن بھلا ہے بری جدائی ۔18۔

لوکی مت اپنی دسن ۔
میں پر تیر قہر دے کسن ۔
خفتن جھلی کہہ کہہ ہسن ۔
بے درداں نوں درد ن رائی ۔
مرن بھلا ہے بری جدائی ۔19۔

تدھ بن پیارے کس نوں بولاں ۔
کہ تے بھید دلے دے خولاں ۔
ہر دم وانگ پکھے دے ڈولاں ۔
ویکھ بیدردن سبھ لکائی ۔
مرن بھلا ہے بری جدائی ۔20۔

پیکے سہرے کوڑ بہانہ ۔
تدھ بن جھوٹھا سگل زمانہ ۔
پڑھ کے ڈٹھا بید کرانا ۔
تاں بھی تیری سار نہ پائی ۔
مرن بھلا ہے بری جدائی ۔21۔

مہر کریں پھیری اک پاویں ۔
اس بندی دی بند چھڈاویں ۔
اپنیں ہتھیں مار گواویں ۔
تاں میرے من خوف نہ رائی ۔
مرن بھلا ہے بری جدائی ۔22۔

آ مل پیارے آ لگ چھاتی ۔
تدھ بن جائے قہر دی راتی ۔
لا کے وچّ جگر دے کاتی ۔
مڑکے سار نہ لئیؤ کائی ۔
مرن بھلا ہے بری جدائی ۔23۔

آ ہن آ جا دل دے اندر ۔
تدھ بن دسن خالی مندر ۔
تینوں بھالن شاہ قلندر ۔
میں تیرے توں گھول گھمائی ۔
مرن بھلا ہے بری جدائی ۔24۔

واہ واہ پیارے واہ واہ جانی ۔
توں ساگر میں بوند نمانی ۔
رہا نہ میرا نام نشانی ۔
توں کر کر وچّ سمائی ۔
مرن بھلا ہے بری جدائی ۔25۔

پال سنگھ توں آپے سوئی ۔
جس دی طول نہ دوجا کوئی ۔
ہن مل اس نوں اوہی ہوئی ۔
لہر سمندر وچّ سمائی ۔
مرن بھلا ہے بری جدائی ۔26۔

مرشد مینوں سبق بھڑایا ۔
یارو یار چوترپھے چھایا ۔
واحد ایکو ایک دکھایا ۔
ہن کس دا جاپ جپاواں میں ۔
کی دل دا بھیت سناواں میں ۔1۔

کس دی خاطر مکے جاواں ۔
اوتھوں کس نوں ڈھونڈھ لیاواں ۔
جیہڑی ترپھے اکھ اٹھاواں ۔
میں میں نظری آواں میں ۔
کی دل دا بھیت سناواں میں ۔2۔

جب دلبر دے ہوئے نظارے ۔
اس دا روپ ہوئے پھر سارے ۔
اوہی دسدا طرفاں چارے ۔
جدھر اکھ اٹھاواں میں ۔
کی دل دا بھیت سناواں میں ۔3۔

جاں میں میں نے مار گوائی ۔
خودی چھڈّ کے ملی خدائی ۔
جیوں کر بوند سمندر سمائی ۔
ہو فانی رب کہاواں میں ۔
کی دل دا بھیت سناواں میں ۔4۔

'نہ ہنو اکبر' سن زندگانی ۔
وچّ قرآن کلام ربانی ۔
شاہ رگ نیڑے دلبر جانی ۔
کیا مسجد میں جاواں میں ۔
کی دل دا بھیت سناواں میں ۔5۔

پانی وگدا ہے وچّ گنگا ۔
گیان گنگ میں نھاون چنگا ۔
ملیا یار گئی سبھ سنگا ۔
کیا گنگا میں نھاواں میں ۔
کی دل دا بھیت سناواں میں ۔6۔

کس دی خاطر بھیکھ بناواں ۔
جوگی ہو کس نوں دکھلاواں ۔
ہر رنگ میں ہی میں دس آواں ۔
کس نوں بید پڑھاواں میں ۔
کی دل دا بھیت سناواں میں ۔7۔

جت ول دیکھاں دلبر جانی ۔
لاکھ ترنگاں ایکو پانی ۔
جیوں اک سوت ہوئی بہو تانی ۔
کیا قدرت آکھ بتاواں میں ۔
کی دل دا بھیت سناواں میں ۔8۔

سپنے کا سبھ جگت پسارا ۔
جاگے ایکو روپ ہمارا ۔
کدھرے سورج چند ستارہ ۔
کدھرے راج کماواں میں ۔
کی دل دا بھیت سناواں میں ۔9۔

جاں میں دیکھاں صورتَ پیاری ۔
ویری ہوئی خلقت ساری ۔
کدھرے نر ہے کدھرے ناری ۔
کیا کچھ رنگ دکھاواں میں ۔
کی دل دا بھیت سناواں میں ۔10۔

ہر رنگ دے وچّ ہر ہی وسے ۔
آپے 'لا مکانی' دسے ۔
ٹٹے غفلت والے رسے ۔
ہن کی بھیکھ بناواں میں ۔
کی دل دا بھیت سناواں میں ۔11۔

خلقت سانوں کافر کہندی ۔
اپنے آپ دی سار نہ لیندی ۔
لا دیکھو ہتھ پر مہندی ۔
پچھے رنگ سہاواں میں ۔
کی دل دا بھیت سناواں میں ۔12۔

گھر وچّ یار نہ ڈھونڈے کائی ۔
تیرتھ مکے جان سدھائی ۔
بھلی پھردی سبھ لکائی ۔
کس کس نوں سمجھاواں میں ۔
کی دل دا بھیت سناواں میں ۔13۔

سچ کہاں تاں دشمن لکھاں ۔
دل وچّ بھید کویں کر رکھاں ۔
اگ نہ چھپدی اندر ککھاں ۔
کیکر عشقَ چھپاواں میں ۔
کی دل دا بھیت سناواں میں ۔14۔

جو کوئی بھیکھ پکھنڈ بناوے ۔
سو جگ اندر آدر پاوے ۔
سچ کہے تے کھلّ لہاوے ۔
ساچو ساچ الاواں میں ۔
کی دل دا بھیت سناواں میں ۔15۔

شاہ رگ نیڑے دلبر وسدا ۔
ایہہ جگ ڈھونڈھن باہر نسدا ۔
کدھرے روندا کدھرے ہسدا ۔
کی چھڈاں کی پاواں میں ۔
کی دل دا بھیت سناواں میں ۔16۔

ووہی تن میں ووہی من میں ۔
ووہی بستی ووہی بن میں ۔
ووہی لڑتا جا رن میں ۔
ووہی تو ووہی گاواں میں ۔
کی دل دا بھیت سناواں میں ۔17۔

کہیں سوہنی صورتَ پیاری ہے ۔
کہیں حسن سنگاری ناری ہے ۔
کہیں لوہا کہیں کٹاری ہے ۔
کہیں قطرہ سندھ کہاواں میں ۔
کی دل دا بھیت سناواں میں ۔18۔

کہیں بید کرانا پڑدا ہے ۔
کہیں میں ہک میں ہک کردا ہے ۔
کہیں ہک کہن تھیں لڑدا ہے ۔
کہیں ہکو ہک بتاواں میں ۔
کی دل دا بھیت سناواں میں ۔19۔

ساچ کہوں نہیں کوئی مندا ۔
ایپر دوجے پتہ کی من دا ۔
مورکھ دیکھن بانا تن دا ۔
لاکھوں روپ وٹاواں میں ۔
کی دل دا بھیت سناواں میں ۔20۔

کدھرے راجے راج کماویں ۔
کدھرے گلیاں بھیکھ منگاویں ۔
ہم ہی لکھ لکھ روپ وٹاویں ۔
پیر میر بن آواں میں ۔
کی دل دا بھیت سناواں میں ۔21۔

کدھرے جاگیں کدھرے سوویں ۔
کدھرے ہسیں کدھرے روویں ۔
کدھرے اینل ہک بگوویں ۔
کھیل مدار کھلاواں میں ۔
کی دل دا بھیت سناواں میں ۔22۔

آوو دیکھو شکل ہماری ۔
جیوں کر ہے کستوری کاری ۔
جے کوئی آوے ساچ بپاری ۔
اس سے مل پواواں میں ۔
کی دل دا بھیت سناواں میں ۔23۔

میں ہی بلھا شاہ ہو آیا ۔
ہو منصور اینل ہک گایا ۔
شاہ شمس بن چمّ لہایا ۔
ہر رنگ ہر ہو آواں میں ۔
کی دل دا بھیت سناواں میں ۔24۔

سوہنے دا ہے سبھ پسارا ۔
دھرت اکاش چند ستارہ ۔
کدھرے چٹا کدھرے کارا ۔
پر بے رنگ کہاواں میں ۔
کی دل دا بھیت سناواں میں ۔25۔

جاگرت سپن سکھوپت کہندے ۔
تریا چھوڈ پرھے ہو رہندے ۔
کدھرے لا-مکانی بہندے ۔
چھوڈ جگ سبھ جاواں میں ۔
کی دل دا بھیت سناواں میں ۔26۔

سپنے اندر دلبر پایا ۔
جاگے دوجا نظر نہ آیا ۔
نہیں کجھ پایا نہیں گوایا ۔
کس پر شور مچاواں میں ۔
کی دل دا بھیت سناواں میں ۔27۔

پالا سنگھ ہن کی کجھ گائیے ۔
قطرے وانگ سمند سمائیے ۔
اس نوں مل اوہی ہو جائیے ۔
ایک انیک سداواں میں ۔
کی دل دا بھیت سناواں میں ۔28۔

ایہہ (جگ) جوگی والا پھیرا ۔
نہ کچھ تیرا نہ کچھ میرا ۔
اٹھ جانا ہے سنجھ سویرا ۔
کیا راجا کیا رانا ہے ۔
یہ جگت مسافر خانا ہے ۔1۔

لاکھوں پیر میر جگ ہوئے ۔
اوڑک نوں تھر رہا نہ کوئِ ۔
انت بار ہنجھو بھر روئے ۔
سبھ نے ہی چل جانا ہے ۔
یہ جگت مسافر خانا ہے ۔2۔

ساگر لاکھ ترنگ بنائے ۔
تٹے اندر سندھ سمائے ۔
پات پون نے توڑ اڈائے ۔
دیکھو باغ ورانا ہے ۔
یہ جگت مسافر خانا ہے ۔3۔

کیا کسی سے دعویٰ کریئے ۔
اس دنیاں پر کیا دل دھریئے ۔
جاں چر رہیئے تاں بھی مریئے ۔
تن دا خاکی بانا ہے ۔
یہ جگت مسافر خانا ہے ۔4۔

کس دے نال لگائیے یاری ۔
جھوٹھی دسے خلقت ساری ۔
نہ کوئی پتر بھین نہ ناری ۔
دو دن کا گجرانا ہے ۔
یہ جگت مسافر خانا ہے ۔5۔

راون سونے لنک اساری ۔
اک لکھ سندر جہں گھر ناری ۔
کارو مایہ بیشماری ۔
سو بھی ہوئِ رجانا(روانہ) ہے ۔
یہ جگت مسافر خانا ہے ۔6۔

آدم تانہی جاں دم آوے ۔
دم جاوے آدم مر جاوے ۔
دم دم جو دلدار دھیاوے ۔
اس دا دمّ کی جانا ہے ۔
یہ جگت مسافر خانا ہے ۔7۔

جنہاں بہتا راج کمایا ۔
چار کوٹ پر حکم چلایا ۔
قدموں پر جہان جھکایا ۔
وہ اب خواب سمانا ہے ۔
یہ جگت مسافر خانا ہے ۔8۔

جو ہوئیاں جگ حوراں پریاں ۔
سو بھی اوڑک نوں سبھ مریاں ۔
چکھا برہوں دی اندر سڑیاں ۔
جیوں جلدا پروانہ ہے ۔
یہ جگت مسافر خانا ہے ۔9۔

سوہنی صورتَ حسن جوانی ۔
جس دے دوجا کوئی نہ ثانی ۔
ایہہ گلزار چار دن جانی ۔
سبھ پھلاں کملانا ہے ۔
یہ جگت مسافر خانا ہے ۔10۔

دیکھ کھلی سندر گلزاری ۔
بلبل لا بیٹھی ہن یاری ۔
آئِ خزاں نے سبھ اجاڑی ۔
بلبل نے پچھتانا ہے ۔
یہ جگت مسافر خانا ہے ۔11۔

عاشق عشقَ مشوکاں مارے ۔
کی کجھ بولن مکھوں وچارے ۔
جا دیکھے ہیں زخمی سارے ۔
جگر عاشق چھانا ہے ۔
یہ جگت مسافر خانا ہے ۔12۔

ہسیں کھیڈیں خوشی مناویں ۔
پکے محل مکان بناویں ۔
دل وچ مولٰی ناہں دھیاویں ۔
توں کوئی بڑا دیوانہ ہے ۔
یہ جگت مسافر خانا ہے ۔13۔

بھے ساگر سمجھو سنسارا ۔
اس وچ ڈبے بیشمارا ۔
اپر مال خزانہ بھارا ۔
بیڑا ہیٹھ پرانا ہے ۔
یہ جگت مسافر خانا ہے ۔14۔

پہلی عمرہ کھیڈ گوائی ۔
وشیاں وچ جوانی جائی ۔
اب ہن بردھ اوستھا آئی ۔
کال بلی نے خانا ہے ۔
یہ جگت مسافر خانا ہے ۔15۔

جب نر کا دھن بل گھٹ جاوے ۔
ناری دوجا خصم بناوے ۔
ساک انگ نہ نیڑے آوے ۔
اپنا ہوئِ بیگانہ ہے ۔
یہ جگت مسافر خانا ہے ۔16۔

جگ وچ مول نہیں کوئی تیرا ۔
کاہنوں کرنا ایں میرا میرا ۔
اب ہی کرو اجاڑی ڈیرہ ۔
اوڑک جنگل جانا ہے ۔
یہ جگت مسافر خانا ہے ۔17۔

جس تن دا ابھیمان دکھاویں ۔
سیسہ سرمہ عطر لگاویں ۔
آکڑ چلیں دھرت ہلاویں ۔
وچ آتش جل جانا ہے ۔
یہ جگت مسافر خانا ہے ۔18۔

سکھ وچ سبھے یار تمارے ۔
جاں دکھ لگے دشمن سارے ۔
اب ہی تنکے توڑ پیارے ۔
سبھ کا کوڑ یارانہ ہے ۔
یہ جگت مسافر خانا ہے ۔19۔

پال سنگھ نہ آوے جاوے ۔
جو وچ جوتی جوت ملاوے ۔
ہر ہی ہو ہر رنگ سماوے ۔
سمجھے خواب سمانا ہے ۔
یہ جگت مسافر خانا ہے ۔20۔

ہردم یاد رکھ کرتارا ۔
جس بن تیرا نہیں چھٹکارا ۔
وانگ سراؤں سمجھ جگ سارا ۔
اک دن چھوڈ سدھاوینگا ۔
کہُ کی پلے لے جاوینگا ۔1۔

اب ہی سمجھ یہی ہے ویلا ۔
جاسیں جانی باجھ اکیلا ۔
بہر نہ ہوسی ایسا میلہ ۔
انت بار پچھتاوینگا ۔
کہُ کی پلے لے جاوینگا ۔2۔

محل مکان اچی اٹاری ۔
سوہنی صورتَ ناری پیاری ۔
مایہ دولت بیشماری ۔
ننگیں پیریں دھاوینگا ۔
کہُ کی پلے لے جاوینگا ۔3۔

جہنا سنگ پریت لگائی ۔
انت بار نہ کوئی سہائی ۔
جھوٹھے ساک سین ست بھائی ۔
پھس پھس چوٹاں کھاوینگا ۔
کہُ کی پلے لے جاوینگا ۔4۔

جنہاں محل مکان بنائے ۔
کال بلی نے مار گوائے ۔
راون جیہے خاک رلائے ۔
توں بھی بھسم سماوینگا ۔
کہُ کی پلے لے جاوینگا ۔5۔

جب کے موت تیرے سر عاصی ۔
تب پھر پیش نہ کوئی جاسی ۔
ایہہ جند کونج وانگ کرلاسی ۔
رو رو نیر وہاوینگا ۔
کہُ کی پلے لے جاوینگا ۔6۔

راون سونے لنک بنائی ۔
جاتی وار نہیں کم آئی ۔
اک لکھ نعر نہ سنگ سدھائی ۔
توں کی ساتھ لے جاوینگا ۔
کہُ کی پلے لے جاوینگا ۔7۔

جنھ گھر فوجاں ہاتھی گھوڑے ۔
چالی گنج کروں نے جوڑے ۔
جاتی وار پڑے ہی چھوڑے ۔
توں کی بنت بناوینگا ۔
کہُ کی پلے لے جاوینگا ۔8۔

جو تیرے اب میت کہاون ۔
تینوں ہتھیں پکڑ جلاون ۔
جالے باجھ انّ نہیں کھاون ۔
کب دل کو سمجھاوینگا ۔
کہُ کی پلے لے جاوینگا ۔9۔

جے توں اپنا آپ گواویں ۔
گلی یار دی پھیرا پاویں ۔
جانی جانی ہر دم گاویں ۔
توں جانی سدواوینگا ۔
کہُ کی پلے لے جاوینگا ۔10۔

دیکھ بیج نے آپ گوایا ۔
بیجوں ہی پھر برچھ بنایا ۔
پات پھول پھل لاکھوں لایا ۔
تؤں ہر رنگ سماوینگا ۔
کہُ کی پلے لے جاوینگا ۔11۔

بھٹھّ پیا دلبر بن جینا ۔
حرام لکھو سبھ خانا پینا ۔
آ توں سمجھ نہ تھیؤ کمینہ ۔
سوچ سوچ سکھ پاوینگا ۔
کہُ کی پلے لے جاوینگا ۔12۔

پال سنگھ بس کر ہن پیارے ۔
تیرے ہی سبھ رنگ پسارے ۔
بگے رتے پیرے کارے ۔
کد دل اندر آوینگا ۔
کہُ کی پلے لے جاوینگا ۔13۔

ساقی ایسا جام پلانا ۔
جس پی ہو جاؤں دیوانہ ۔
مست بے ہوش مثل پروانہ ۔
جل جاؤں دلبر پر جا ۔
تیں پر میری جان فدا ۔1۔

سن پیارے اک عرض ہماری ۔
مجھکو مارو کھینچ کٹاری ۔
جاں سانوں آ مل اک واری ۔
ہر دم مینوں نہ ترسا ۔
تیں پر میری جان فدا ۔2۔

لوکاں ساتھ کریں اشنائی ۔
اور ہمارے سنگ لڑائی ۔
تیرے کوچے دیاں دہائی ۔
کبی تو گل سے آن لگا ۔
تیں پر میری جان فدا ۔3۔

آ مل سوہنی شکل پیاری ۔
تیں بن سینے وچ کٹاری ۔
دوجی ویری خلقت ساری ۔
مول نہ میتھیں مکھ چھپا ۔
تیں پر میری جان فدا ۔4۔

جدھر جاواں جنگ لڑائیاں ۔
ہائِ میں بھل اکھیاں لائیاں ۔
بھڑکن اگاں دون سوائیاں ۔
عشقے دتا شور مچا ۔
تیں پر میری جان فدا ۔5۔

جب کا تیرا ہوا نظارہ ۔
جیوں کر بجلی دا چمکارا ۔
ہو گیا ایہہ دل پارا پارا ۔
دتا اپنا آپ گوا ۔
تیں پر میری جان فدا ۔6۔

تیرے نین جویں تلواراں ۔
پھٹے عاشق بیشماراں ۔
روندے پھردے جنگل باراں ۔
مول نہ میتھیں سچ پچھا ۔
تیں پر میری جان فدا ۔7۔

دسو گل تماری آواں ۔
چاہے الٹی کھلّ لہاواں ۔
تاں بھی پچھے قدم نہ پاواں ۔
خنجر مار لوو عظمہ ۔
تیں پر میری جان فدا ۔8۔

ہم تیرے پر ہوئے دیوانے ۔
دیوے پر جیسے پروانے ۔
جسنوں لگے ووہی جانے ۔
بیخبراں نوں خبر نہ کا ۔
تیں پر میری جان فدا ۔9۔

توں ہیں ساگر حسن پیارے ۔
ہم بھی قطرے ہیں تمارے ۔
آ ہن ظاہر دے نظارے ۔
مکھ توں پڑدا چائ اٹھا ۔
تیں پر میری جان فدا ۔10۔

تدھ بن دکھی روز وہاون ۔
برسن نین برس جھڑ لاون ۔
ساون جیوں بادل برساون ۔
رو رو دتا بحر وگا ۔
تیں پر میری جان فدا ۔11۔

میں جیواں مکھ دیکھاں تیرا ۔
سپنے اندر کر اک پھیرا ۔
دل وچ آ گیا دلبر میرا ۔
کیا دیکھاں مکے میں جا ۔
تیں پر میری جان فدا ۔12۔

دمّ دمّ تیرا ہی دمّ بھرساں ۔
جاں توں جاسیں تاں میں مرساں ۔
جان قربان تیرے پر کرساں ۔
توں بھی مینوں ناہِ بھلا ۔
تیں پر میری جان فدا ۔13۔

ساک انگ سبھ دور سدھارے ۔
بھائی ملاں جھوٹھے سارے ۔
بید قرآن ن کام ہمارے ۔
راج کاج کو آگ لگا ۔
تیں پر میری جان فدا ۔14۔

میں اک چاہوں درس تمارا ۔
تدھ بن کوڑ سگل سنسارا ۔
جے توں دوست ہیں ہمارا ۔
مینوں اپنے سنگ ملا ۔
تیں پر میری جان فدا ۔15۔

کہندے عارف لوک سیانے ۔
توں ہر رنگی موجاں مانے ۔
باہر ڈھونڈھن لوک دیوانے ۔
تینوں تدھ بن لکھے نہ کا ۔
تیں پر میری جان فدا ۔16۔

ہائِ ہائِ پیارے کیوں مکھ موڑیں ۔
یاری لائِ محبت توڑیں ۔
ساتھوں توڑ اور سنگ جوڑیں ۔
چلیوں دل دا چین چرا ۔
تیں پر میری جان فدا ۔17۔

جیکر ہووے وصل تمارا ۔
ایہہ دل ٹٹا جڑے ہمارا ۔
خواب خیال دسے جگ سارا ۔
ایسی مست شراب پلا ۔
تیں پر میری جان فدا ۔18۔

تینوں مل جو لذت پائی ۔
سو میں کسنوں کہاں سنائی ۔
کہنے سننے وچ نہ آئی ۔
اوس جگا پر بند جباں ۔
تیں پر میری جان فدا ۔19۔

جاں میں اپنا آپ گوایا ۔
ہر رنگ آپے آپ سمایا ۔
خدی چھوڈ خداؤ کہایا ۔
گیا سمند حباب سما ۔
تیں پر میری جان فدا ۔20۔

پال سنگھ عارف سن پیارے ۔
تیرے ہی سبھ رنگ پسارے ۔
مے مے چھوڈی سبھی ہمارے ۔
توں میں اندر فرق نہ کا ۔
تیں پر میری جان فدا ۔21۔

جب معشوق نین لڑاون ۔
عاشق ترت قتل ہو جاون ۔
مرنو رتی خوف نہ کھاون ۔
دیکھ سولیاں ہسدے نی ۔
بن ڈٹھیاں نین ترسدے نی ۔1۔

زلف پیارے والی کالی ۔
جیوں کر ناگ لٹکدے ڈالی ۔
دیکھ مہبوباں لائی جالی ۔
جا عاشق وچ پھسدے نی ۔
بن ڈٹھیاں نین ترسدے نی ۔2۔

نینا والی بری کٹاری ۔
اینا کٹھی خلقت ساری ۔
جتھے دیکھن صورتِ پیاری ۔
جان اتے ول نسدے نی ۔
بن ڈٹھیاں نین ترسدے نی ۔3۔

جے نہ جانی مکھ دکھاوے ۔
عاشق دی جند غوطے کھاوے ۔
برہوں آتش جگر جلاوے ۔
چھم چھم نین برسدے نی ۔
بن ڈٹھیاں نین ترسدے نی ۔4۔

بھورے پھلاں پریتِ لگائی ۔
بلبل دیندی پھرے دہائی ۔
ہے کیوں خزاں چمن میں آئی ۔
دل جانی دل کھسدے نی ۔
بن ڈٹھیاں نین ترسدے نی ۔5۔

جے نین سے نین ملائیے ۔
یا رب رکھے تاں مڑ آئیے ۔
کی کچھ دل دا حالَ سنائیے ۔
تیر جگر وچ دھسدے نی ۔
بن ڈٹھیاں نین ترسدے نی ۔6۔

لگی جنہاں نوں جگر ہرانی ۔
ووہی کردے جانی جانی ۔
تڑپھن جیوں مچھلی بن پانی ۔
ایپر بھید نہ دسدے نی ۔
بن ڈٹھیاں نین ترسدے نی ۔7۔

کئی اگاں وچ جلائے ۔
کئی سولی پکڑ جھڑائے ۔
نیناں لکھ فقیر بنائے ۔
جا جنگل وچ وسدے نی ۔
بن ڈٹھیاں نین ترسدے نی ۔8۔

عاشق ہوئے مست دیوانے ۔
ان کو ان بن کوئِ نہ جانے ۔
لوکی جھوٹھے مارن تانے ۔
ناگ جویں کر ڈسدے نی ۔
بن ڈٹھیاں نین ترسدے نی ۔9۔

جنہاں پیتے پریم پیالے ۔
سوئی مست رہن ہر حالے ۔
دیکھ ترنگ ہوئے متوالے ۔
جائ شمع وچ دھسدے نی ۔
بن ڈٹھیاں نین ترسدے نی ۔10۔

پال سنگھ ایہہ بریاں اکھیں ۔
مرزے جہے جلائے ککھیں ۔
سمبھل قدم اگیرے رکھیں ۔
تیر قہر دے کسدے نی ۔
بن ڈٹھیاں نین ترسدے نی ۔11۔

عاشق مرد سدا متوالے ۔
جنہاں پیتے پریم پیالے ۔
ایپر اگّ عشقَ دی جالے ۔
جیوں دیپک پروانے نی ۔
عاشق ہر حالَ دیوانے نی ۔1۔

جاون گلی مہبوباں والی ۔
تن من کھدیؤں کرکے خالی ۔
ویکھن صورتَ والی والی ۔
ویکھ ویکھ مستانے نی ۔
عاشق ہر حالَ دیوانے نی ۔2۔

جدھر دیکھن اودھر جانی ۔
جیوں اک سوت ہوئی بہو تانی ۔
سبھ ترنگاں اندر پانی ۔
بیجوں برچھ سیانے نی ۔
عاشق ہر حالَ دیوانے نی ۔3۔

مکے نوں ناہی وہ جاون ۔
گنگا کاشی قدم نہ پاون ۔
نہ کچھ پوجن ناہِ پجاون ۔
نہ کچھ دین ایمانے نی ۔
عاشق ہر حالَ دیوانے نی ۔4۔

عاشق ذات پات نہ جانن ۔
مایہ دولت ناہِ سیانن ۔
شرا مذہب کوئی نہ مانن ۔
دلبر پر قربانے نی ۔
عاشق ہر حالَ دیوانے نی ۔5۔

عشقے وچ نہ ذات سپھات ۔
سورج پاس کہاں دن رات ۔
لوک کی جانن اسدی بات ۔
مارن جھوٹھے تانے نی ۔
عاشق ہر حالَ دیوانے نی ۔6۔

ساچُ کہیئے تاں کھلّ لہائیے ۔
کہنو بھی کیسے ہٹ جائیے ۔
ہندو اندھے سبھ سنائیے ۔
تے ایہہ مصلے کانے نی ۔
عاشق ہر حالَ دیوانے نی ۔7۔

دیکھ پکھنڈی سیس نواون ۔
ساچے نوں پھڑ دار چڑاون ۔
نہ کچھ سوچن ظلم کماون ۔
کافر سادھ ملانے نی ۔
عاشق ہر حالَ دیوانے نی ۔8۔

عاشق مے ہک مے ہک کردے ۔
سولی ساروں مول نہ ڈردے ۔
پیر کٹاری اپر دھردے ۔
جان بوجھ انجانے نی ۔
عاشق ہر حالَ دیوانے نی ۔9۔

جتھے عشقَ ہوریں چل آئے ۔
اوتھوں شرم ہیاؤ اٹھائے ۔
نرک سرگ دے خوف گوائے ۔
تے کیا راجے رانے نی ۔
عاشق ہر حالَ دیوانے نی ۔10۔

کے تو پھردے بیچ اجاڑاں ۔
کے جا ڈیرہ کرن پہاڑاں ۔
کے کھیلن سنگ سندر ناراں ۔
بھور جویں بستانے نی ۔
عاشق ہر حالَ دیوانے نی ۔11۔

کے تو ہوون حالَ امیراں ۔
کے تو اپر پاٹی لیراں ۔
کے تو منجا ہیٹھ کریراں ۔
کے وچ محل مکانے نی ۔
عاشق ہر حالَ دیوانے نی ۔12۔

کے تو حسن کھیڈن گاون ۔
کے تو لامبے پاؤں پھیلاون ۔
کے چپ کے بہو شور مچاون ۔
کے دانے پردھانے نی ۔
عاشق ہر حالَ دیوانے نی ۔13۔

کے تو بید قراناں پڑھدے ۔
کے جا چودیں تبکیں وڑدے ۔
کے جا اوس جگا پر چڑدے ۔
جتھے بند زبانے نی ۔
عاشق ہر حالَ دیوانے نی ۔14۔

عشقے والی چال نیاری ۔
جیوں کر کھیلے کھیل مداری ۔
انکو ورلا لکھے لکھاری ۔
دیکھت لوک ہیرانے نی ۔
عاشق ہر حالَ دیوانے نی ۔15۔

پال سنگھ جے آپ گواویں ۔
تاں توں بھید عشقَ دا پاویں ۔
جانی مل جانی ہو جاویں ۔
جسدے ایہہ سبھ بھانے نی ۔
عاشق ہر حالَ دیوانے نی ۔16۔