لال چند یملا جٹّ پنجابی شاعری/گیت
ستگور نانک تیری لیلا نیاری اے
نیجھاں لا لا وینہدی دنیاں ساری اے
بھل بھلیکھے مڑکے پھیرا پا جاویں
چارے کوٹ ہنیرا جوت جگا جاویں
بانی دے تھاں فیشن چڑھی خماری اے
ستگور نانک تیری لیلا نیاری اے
کوڈے نالوں ودھ کے ہن وی راکھش نے
کوڑ کماندے پھردے جھوٹھے عاشق نے
چھڈّ جانا نہں لا کے کی دلداری اے ؟
ستگور نانک تیری لیلا نیاری اے
تیرے لیکھے بندے آدم کھانے نے
سجن نالوں ودھ کے ٹھگّ سیانے نے
سدھنے دے ہتھ مڑکے پھڑی کٹاری اے
ستگور نانک تیری لیلا نیاری اے
بھاگو ورگیاں لوکاں لٹّ مچائی اے
حق بگانہ کھانا کی وڈیائی اے
اج اوہ موج اڈاوے جو ہنکاری اے
ستگور نانک تیری لیلا نیاری اے
توں سکھیاں دی کھیتی حلّ چلاندا سیں
دساں نوھاں دی کرت کمائی کھاندا سیں
تاہیؤں تیری شوبھا ہر تھاں بھاری اے
ستگور نانک تیری لیلا نیاری اے
'جٹّ' دی تار دیوانی پئی کرلاندی اے
آ دنیاں دے والی ترلے پاندی اے
وچ وچھوڑے تیرے ایہہ دکھیاری اے
ستگور نانک تیری لیلا نیاری اے
ستگور نانک تیری لیلا نیاری اے
نیجھاں لا لا وینہدی دنیاں ساری اے
ستگور نانک آ جا سنگت پئی پکاردی
تیرے ہتھ وچّ چابی او داتا سارے سنسار دی
جیلھاں وچّ جا کے دکھیاں دا توں دکھ نواریا
توں کرم کمایا ایسا ڈبیاں نوں تاریا
توں آکڑ بھنیں داتا بابر سرکار دی
تیرے ہتھ وچّ چابی او داتا سارے سنسار دی
پربت نوں پنجہ لا کے توں ڈگدا اٹکا لیا
ولیاں دے ول چھل کڈھ کے توں راہے پا لیا
تیری بانی دے وچ بابا ہر بات وچار دی
تیرے ہتھ وچّ چابی او داتا سارے سنسار دی
اوہ پنجہ تے ننکانہ نظراں توں دور نے
تیری دید دی خاتر بابا اکھیاں مجبور نے
'یملے جٹّ' دی توں بی تینوں واجاں ماردی
تیرے ہتھ وچّ چابی او داتا سارے سنسار دی
ستگور نانک آ جا
دنیاں نوں دید دکھا سنگت پئی پکاردی
تیرے ہتھ وچّ چابی او داتا سارے سنسار دی
جگّ دیا چاننا توں مکھ نہ لکا وے
نانکی نوں مان تیرا ترپتا نوں چاء وے
بڈھے جیہے باپ تینوں چائواں نال پالیا
سندر جوانی وچ بچپن ڈھالیا
پتا دے کلیجے نوں وی ٹھوکراں نہ لا وے
جگّ دیا چاننا توں مکھ نہ لکا وے
امیں دیاں سدھراں ہوئیاں نہیوں پوریاں
بھین دیاں آساں اجے پئیاں نی ادھوریاں
پا نہ وچھوڑا میرا دل نہ دکھا وے
جگّ دیا چاننا توں مکھ نہ لکا وے
وے چھوٹے چھوٹے بال تیرے ہنجھو پئے نی ڈولھدے
پتا کتھے چلیا اے امیں تائیں بولدے
لکھی اے جو لیکھاں وچ کردا خدا وے
جگّ دیا چاننا توں مکھ نہ لکا وے
ہسّ مکھوں بابا جی سبھ نوں اچاردے
جھوٹھے نے پیار ایتھے کلّ سنسار دے
سن کے سلکھنی نوں ہو گیا شدہ وے
جگّ دیا چاننا توں مکھ نہ لکا وے
جگّ دیا چاننا توں مکھ نہ لکا وے
نانکی نوں مان تیرا ترپتا نوں چاء وے
بھین نانکی ویر دی تانگھ اندر
ہو گئی سکّ کے وانگراں لکڑی اے
موتی ہنجھوآں دے اکھوں کرن لگّ پئے
چھلکی دلوں پیار دی سچری اے
بندے بندے دی جیہڑی پوا گیا سیں
وے گئی کھل اج اوہ گلوکڑی اے
اجڑے کھیت وساونے والیا وے
کہ دھرتی پھیر پکاردی رکڑی اے
اکھیاں دے وچ نچدے پھردے تیرے چوج نرالے
نوری مکھڑا پھیر وکھا جا کہندے ناگ نے کالے
دل تے پیار دیاں جوتاں پھیر جگا
میریا ویرا شاہی فقیرا نانک ویرا وے
کدی تے پھیرا پا آ جا ویرا وے کدی تے پھیرا پا
اج تیری تلونڈی ویرا تینوں پئی پکارے
مجھیں ویکھن چک چک بوتھے سانوں کہڑا چارے
دل دیاں زخماں تے آ پیار دیاں مرھماں لا
میریا ویرا شاہی فقیرا نانک ویرا وے
کدی تے پھیرا پا آ جا ویرا وے کدی تے پھیرا پا
سچے سودے کردا پھردیں (پھرنیں) رل کے نال فقیراں
بھکھیاں تائیں پھیر کھلا جا پورے حلوے کھیراں
مودی خانے نوں آ کے پھیر لٹا
میریا ویرا شاہی فقیرا نانک ویرا وے
کدی تے پھیرا پا آ جا ویرا وے کدی تے پھیرا پا
میں تیری توں میرا چھڈّ نہ جاویں وے
جو الڑھپنے وچ لائیاں توڑ نبھاویں وے
ہنس ہنسنی وانگوں چناں تیرا میرا جوڑا
تیرے باجھوں سہل چکوری کیکوں سہاں وچھوڑا
چن ہو اکھیاں توں اہلے نہ تڑپاویں وے
جو الڑھپنے وچ لائیاں توڑ نبھاویں وے
میں تیری توں میرا…
پیار تیرے وچ سن وے جٹا میں ہو گئی دیوانی
اگے زخم بتھیرے دل تے ہور نہ ماریں کانی
مینوں زخم وچھوڑا تیرا مرھماں لاویں وے
جو الڑھپنے وچ لائیاں توڑ نبھاویں وے
میں تیری توں میرا چھڈّ نہ جاویں وے
جو الڑھپنے وچ لائیاں توڑ نبھاویں وے
دسّ میں کی پیار وچوں کھٹیا
تیرے نی قراراں مینوں پٹیا
عشقَ والے پاسے دیاں نرداں کھلار کے
جت گئی ایں توں اسیں بہہ گئے بازی ہار کے
مینوں ویکھ کمزور تیرا چل گیا زور
تاہیں منہ توں سجن توں وٹیا
دسّ میں کی پیار وچوں کھٹیا
عاشقاں دا کم ہندے لا کے نبھان دا
جہڑا جاوے چھڈ اوہنوں مہنا ایں جہان دا
نی توں روشنی وکھا کے مینوں دکھاں وچ پا کے
نالے لہو توں سریر وچوں چٹیا
دسّ میں کی پیار وچوں کھٹیا
سسی سوہنی شیریں وانگوں توں وی کجھ سوچ نی
لیلاں وانگوں تتیئے نہ ماس ساڈا نوچ نی
پرھاں چھڈ ایہہ اداواں تینوں اکھاں 'چ بہاواں
تیرے روپ دی کٹاری مینوں پھٹیا
دسّ میں کی پیار وچوں کھٹیا
اوہ گلّ کر لوکی گاؤن نی کہانیاں
ٹھوکراں نہ مار میتھوں سہیاں نہیؤں جانیاں
مینوں تیری نی جدائی کر چھڈیا شدائی
نالے 'یملا' بنا کے پرھاں سٹیا
دسّ میں کی پیار وچوں کھٹیا
جنگل دے وچ کھوہا لوا دے اتے پوا دے ڈول
سخیا نام سائیں دا ای بول
چھڈّ دے چوری یاری ٹھگی دغا فریب کماؤنا
ایہہ انسانی جامہ مڑکے تیرے ہتھ نہیں آؤنا
نہیں ملنے تینوں پلنگھ نواری بستر ہونا ای گول
سخیا نام سائیں دا ای بول
اپنا کیتا سبھنے پانے جو دنیاں تے آیا
خالی ہتھیں جاؤ نمانا جسنے وقت گوایا
وقت گواچا ہتھ نہیں آؤنا کیوں بنیا انبھول
سخیا نام سائیں دا ای بول
ماس بگانہ کھا کھا پلنا لالچ لگّ نہ جر دے
جنہاں واسطے پاپ کمانیں نہیں بننے تیرے گھر وے
تیرے نال کسے نہیں جانا جنہاں نال کریں کلول
سخیا نام سائیں دا ای بول
نہ کر نیند پیاری اینی اس نہیں پار لنگھونا
دیکھیں تینوں جاگ نہیں آؤنی اک دن ایسا سونا
ایس مٹی نے پھر نہیں سننے وجن کناں وچ ڈھول
سخیا نام سائیں دا ای بول
داہ دنیا تے سطر آخر ایزک نے فرمایا
آئِ سوالی موڑ نہ خالی جو تیرے در آیا
پاک ہتھاں نال کریں خریتاں جو کچھ تیرے کول
سخیا نام سائیں دا ای بول
ٹھنڈی ٹھنڈی واء چناں پیندیاں پھہاراں وے
آ جا میرے چناں جند تیرے 'توں دی واراں وے
سنیاں بہاراں مینوں وڈھّ وڈھّ کھاندیاں
تینڈیاں جدائیاں میتھوں سہیاں نہیوں جاندیاں
تیرا میں وچھوڑا ہن پل نہ سہاراں وے
آ جا میرے چناں جند تیرے توں دی واراں وے
ٹھنڈی ٹھنڈی واء…
شیہنی میں پنجاب دی توں ایں دولا شیر وے
تیرے جیہا ماہی مینوں لبھنا نہیں پھیر وے
دن راتیں رہن مینوں ایہو ای وچاراں وے
آ جا میرے چناں جند تیرے توں دی واراں وے
ٹھنڈی ٹھنڈی واء…
اک اک کنی چنگیاڑے وانگوں لگدی
اگّ وے جدائی تیری دونی سگوں مگھدی
سینہ میرا صلی جان بن کے کٹاراں وے
آ جا میرے چناں جند تیرے توں دی واراں وے
ٹھنڈی ٹھنڈی واء…
چھٹی آ کے ماہیا مینوں بھرتی کرا لے وے
کسّ کے نشانہ لانا مینوں وی سکھا لے وے
ماراں تیرے ویری کراں رنڈیاں ہزاراں وے
آ جا میرے چناں جند تیرے توں دی واراں وے
ٹھنڈی ٹھنڈی واء…
مکدی نہ تتی اج غماں والی رات وے
دونی لمی ہوئی جاوے سگوں کم ذات وے
ڈولے من 'جٹا' دے دے تھمھیاں کھلاراں وے
آ جا میرے چناں جند تیرے توں دی واراں وے
ٹھنڈی ٹھنڈی واء…
سنیاں سنیاں گلیاں نی اوہ میرے یار بنا
دل پیا غوطے کھاندا اے دلدار بنا
جس دن دا اوہ ٹر گیا ایتھوں میرا جی نہیں لگدا
ساون وانگوں اکھیاں وچوں پانی چھمچھم وگدا
سینہ سکدا جاوے نی اسدے پیار بنا
دل پیا غوطے کھاندا اے دلدار بنا
سنیاں سنیاں گلیاں نی اوہ میرے یار بنا
دل پیا غوطے کھاندا اے دلدار بنا
چار دہاڑے روپ جوانی ایہہ نہیں مڑکے آؤنی
ٹکا ٹولھے تھاں بتھیرے لبھ لبھ تھکی داؤنی
جیوں گل خالی جاپے نیں کینٹھے ہار بنا
دل پیا غوطے کھاندا اے دلدار بنا
سنیاں سنیاں گلیاں نی اوہ میرے یار بنا
دل پیا غوطے کھاندا اے دلدار بنا
اس 'یملے' نوں کون سناوے میری درد کہانی
اوہ ہے میرے دل دا راجا میں اوہدی پٹرانی
تومبا کون وجاوے نی اکتار بنا
دل پیا غوطے کھاندا اے دلدار بنا
سنیاں سنیاں گلیاں نی اوہ میرے یار بنا
دل پیا غوطے کھاندا اے دلدار بنا
کہندے نے سیانے گلاں سچیاں زبانی
تکے جو سہارا اوہدی کی اے زندگانی
پیار دی خاتر در در پھردے لوکی کہنا آوارہ
شہہ ڈونگھے وچ غوطے کھاندے ملے نہ کوئی سہارا
کچیاں نہ' لا کے ملی دکھاں دی نشانی
تکے جو سہارا اوہدی کی اے زندگانی
کہندے نے سیانے…
سنئیں لوکی سگھڑ سیانے ایویں نہیں وقت گواندے
بنا کم توں عزت والے گھروں باہر نہیں جاندے
چھڈے جو ٹھکانہ اوہدی ہر تھاں تے ہانی
تکے جو سہارا اوہدی کی اے زندگانی
کہندے نے سیانے…
گھوڑے تھانی مرد مقامی دونا ملّ پواندے
اودوں سمجھو قیمت گھٹ گئی جدوں وکن لئی جاندے
دونا ملّ پیندے بیٹھے اپنے مکانی
تکے جو سہارا اوہدی کی اے زندگانی
کہندے نے سیانے…
ستجگ دے وچ پیار سچا سی کلجگ دے وچ ایسا
اوہدا کوئی نہیں ساتھی جگّ تے جس کول ہے نہیں پیسہ
دکھیاں نوں دیوے نہ کوئی پلیوں دوانی
تکے جو سہارا اوہدی کی اے زندگانی
کہندے نے سیانے…
عاشق بکرے وانگوں 'جٹا' توں ہیں شوخ قصائی
دو خط فٹّ ہریاول اگے ہے سی چھری چلائی
پیٹ دے پجاری گالی کسے دی جوانی
تکے جو سہارا اوہدی کی اے زندگانی
کہندے نے سیانے…
(اس رچنا 'تے کم جاری ہے)
| |
