جسونت سنگھ ونتا

جسونت سنگھ ونتا (1901/2-1988 دا جنم پنڈ چونترا تحصیل پنڈی گھیب ضلع کیمبل پور (اٹک) وچ ہویا ۔ کجھ عرصہ کیمبل پور وچ گزارن توں بعد اوہ راولپنڈی چلے گئے ۔ جسونت سنگھ ونتا نے کانگرس تے خلافت دیاں تحریکاں توں متاثر ہو کے قومی تے ملی نظماں لکھیاں جس کرکے کجھ عرصہ اوہناں نوں جیل وچّ وی رہنا پیا ۔ تقسیم (ونڈ) توں بعد پٹیالہ آ گئے ۔ ستمبر 1987 نوں پنجابی یونیورسٹی پٹیالہ وچ ہون والی عالمی پنجابی ادبی کانفرنس چ شرکت کیتی ۔1947 دی ہجرت نے اوہناں دی شاعری تے ڈونگھا اثر پایا ۔ اوہناں دیاں کویتا دیاں کتاباں گلدستہ (1923)، زندگی دا موڑ (1929)، بدلی (1929)، پتجھڑ دے پھلّ' (1957)، کونکن بیر (1971)، وگوگ وے سواں دے پانیاں (1976) ہن ۔

Punjabi Poetry Jaswant Singh Wanta

جسونت سنگھ ونتا پنجابی کویتا

1. اج پھر یاد آئے نے وطناں تیرے کونکن بیر

اج پھر یاد آئے نے وطناں تیرے کونکن بیر
جاں ناں لئیے تاں جی آکھے جیبھ ہوٹھاں تے پھیر

چیچ وہوٹی وانگوں سوہن مٹھے جویں مکھانے
جس نے دید نہ کیتا تیرا اوہ کملا کی جانے

جھجو جھوہن سادے جھاڑاں وچ مارن اویں لشکارے
جویں معیادی راتیں چمکن عرشاں دے وچ تارے

کدھرے کدھرے ورلا کوئی وسدا اے انج پیلا
جیوں کر سبز پری دے نکّ وچ ہوئے سنہری تیلا

جویں پلچھی دے رکھیں بیٹھاں ہسدی کوئی کنیر
اج پھر یاد آئے نے وطناں تیرے کونکن بیر

اج بھگوان منتروں وانجھا مندروں دور پجاری
اج دا عشقَ حسن بھلّ بیٹھا بہت بھلیا ہتھکاری

اج دی محفل اجڑی اجڑی نظر نہ آوے ساقی
اج میخانے تے کی ورتی اک وی پھوہی نہ باقی

اج نیناں وچ ہنجھو بھر کے ٹر پئے رند پیاسے
ہن کی خیر فقیراں منگنی توڑ چلے نے کاسے

اج 'ونتے' توں چانن رسیا اج پے گیا ہنیر
اج پھر یاد آئے نے وطناں تیرے کونکن بیر

2. پتھر دی عمارت بندی اے

پتھر دی عمارت بندی اے، کونڈی، صلع، پرچ پیالی وی،
جس پتھر دا بھگوان بنے، اوہ پتھر کم ن آ سکیا۔

جو ہیر دی قبر دے اتے اج، ماں کہہ کے پیا سلام کرے،
اوہ قاضی جیون وچ اس نوں ‘دھی’، ‘بھین’ وی نئیں بنا سکیا۔

(نوٹ: 'ونتا' جی سنبندھی بہتی جانکاری اتے پہلی رچنا
لیہندے پنجاب توں ارشد سیماب ملک ہوراں بھیجی ہے جو
کیمبلپر ضلعے دے رہن والے ہن ۔ جس پاٹھک کول 'ونتا'
جی دیاں رچناواں ہون اوہ ضرور بھیج دین، مہربانی ہوویگی ۔)