ہروندر سنگھ چنڈیگڑھ — Harvinder Singh Chandigarh

چنڈیگڑھ وسدے پنجابی ادب دے جانے پہچانے ادیب جناب ہروندر سنگھ 13 ستمبر 1963 نوں ہندوستان پنجاب دے ضلع پٹیالہ دے پنڈ ہرانا وچ والدہ سردارنی امرجیت کور اتے والد سردار چانن سنگھ دے گھر اک سدھارن کسان परिवार وچ پیدا ہوئے۔ انہاں دے وڈیرے 1947 دی ونڈ ویلے پاکستان لائلپور بار دے خطے توں آ کے اتھے وس گئے سن۔ انہاں پنجابی یونیورسٹی پٹیالہ توں ایم. اے. اکنامکس دی تعلیم حاصل کرن توں بعد پنجاب پبلک سروس کمیشن راہیں صوبے دے فنانس تے منصوبہ بندی محکمہ وچ بطور سرکاری اہلکار تعینات ہوئے تے جوائنٹ ڈائریکٹر دے عہدے تک ترقی حاصل کیتی۔ اوہ ہن تک پنجابی ادب دی جھولی وچ نظم دیاں چار کتاباں پا چکے ہن۔ انہاں نے حال ہی وچ پنجاب توں باہر دے لوکاں دے ہندی میڈیم دے ذریعے پنجابی سکھن لئی ‘ہندی سے پنجابی سیکھیں‘ ناں دی اک کتاب وی لکھی ہے تے گرم مکھی توں شاہ مکھی سکھن لئی وی اوہ کتاب لکھ رہے نے۔ اوہ سمیں سمیں پنجاب، پنجابی اتے پنجابیئت نوں درپیش مسئلیاں بارے نامور اخباراں وچ مضمون وی لکھدے رہندے ہن۔ قدیم تاریخ توں ہن تک پنجاب اتے پنجابیئت دے نقشاں دی نشاندہی کردی انہاں دی لمبی نظم دی کتاب “پنج ندیاں دا گیت” بہت مقبول ہوئی سی جو دہلی یونیورسٹی سلیبس وچ وی لگی رہی اتے اس دی بنیاد تے ناٹک ‘میں پنجاب بولدا ہاں‘ وی تیار کرکے کئی تھاواں تے کھیڈیا گیا سی تے اوہ وی کافی مقبول ہویا سی۔ ہروندر سنگھ عالمی امن، صنفی برابری تے قدرت دے حق وچ پرچم بلند کرنے والے لکھاری ہن۔