پنجابی کافیاں گنکاری
1. سئیؤ نی ہنِ آیا ساونِ
سئیؤ نی ہنِ آیا ساونِ،
پیارے دا ن ہویا آون،
مینوں کیہا بھاوے بھاون،
راتی دہیں سکدی ۔1۔رہاؤ۔
بونداں ورسن وانگوں تیرے،
بجلی جیوں کلوتر چیرے،
دھیرے نی میں کتی دھیرے،
ہڈّ دیہی دکھدی ۔1۔
مور ببیہا کوئل کالی،
چڑِ چڑِ بولن امباں ڈالی،
جالی نی میں برہُ جالی،
سولاں جالی دھکھدی ۔2۔
گنکاری گھرِ آوے پیارا،
روندا جیؤ رہے بیچارا،
مینڈا کوئی ناہیں چارہ،
مینوں سک مکھ دی ۔3۔
(راگ مالکؤنس)
(کلوتر=آرا، سک=تانگھ)
2. آوہو ویکھو حالَ اساہاں
آوہو ویکھو حالَ اساہاں،
برہوں کیتا تن داہو داہاں ۔1۔رہاؤ۔
جیں دن دی تیں منہُ وساری،
روندی رہندی جند وچاری،
سبھ سکھ تھیں ایہہ دکھ بھاری،
بیا ن کوئی مہرمُ حالَ ۔1۔
جیون تھیوے اتہی گالوں،
جے ہن بکھرا لہاں وسالوں،
چھٹِ پواں ہنِ آئے کالوں،
پائِ پلو گلِ کریں سوالِ ۔2۔
گنکاری سبھ پجن آسا،
آہیں درد وننجنِ گھنّ پاسہ،
مہر تینڈی دا اکو ماسہ،
لکھ منا غم گھتے ٹالِ ۔3۔
(راگ مالکؤنس)
(بکھرا=حصہ)
| |
