کہو سرتی گلّ کاج دی میں گنڈھاں کیتیاں پاؤں۔
ساہے تے جنج آوسی ہن چالی گنڈھ گھتاؤں۔

بابل آکھیا آن کے تیں سہریاں گھر جانا۔
ریت اوتھے دی اور ہے مڑ پیر نہ ایتھے پانا۔

گنڈھ پہلی نوں کھولھ کے میں بیٹھی برلاواں۔
اوڑک جاون جاونا ہن میں داج رنگاواں۔
دیکھوں طرف بازار دی سبھ رستے لاگے۔
پلے ناہیں روکڑی سبھ مجھ سے بھاگے۔1۔

دوجی کھوہلوں کیا کہوں دن تھوڑھے رہندے۔
سول سبھے رل آنودے سینے وچ بہندے۔
جھل وللی میں ہوئی تند کتّ نہ جانا۔
جنج اویں رل آوسی جیوں چڑھدا ٹھانا۔2۔

تیجی کھوہلوں دکھ سے روندے نین نہ ہٹدے۔
کس نوں پچھاں جائ کے دن جاندے گھٹدے۔
گن والیاں سبھ پیاریاں میں کو گن ناہیں۔
ہتھ ملے مل سر دھراں میں روواں ڈھائیں۔3۔

چوتھی کیا ہوا رل آون سئیاں۔
درد کسے نہ کیتیا سبھ بھج گھر گئیاں۔
وطن بیگانہ ویکھنا کی کریئے ماناں۔
بابل پکڑ چلاوسی دائی بن جانا۔4۔

پنجویں کھوہلوں کوک کے کر شور پکاراں۔
پہلی رات ڈراؤنی کیوں دلوں وساراں؟
مدت تھوہڑی آ رہی کویں داج بناواں؟
جا آکھو گھر ساہورے گنڈھ لاگ ودھاواں۔5۔

گنڈھ چھیویں میں کھولھ کے جگّ دیندی ہوکا۔
گھر آن پئی مہمان ہاں کی کریئے لوکا۔
لگا فکر فراق دا کی کریئے کارا۔
روون اکھیاں میریاں جیوں وگن جھلاراں۔6۔

ستویں گنڈھ چا کھوہلیا میں اوسے حیلے۔
رو رو حالَ ونجایا رنگ ساوے پیلے۔
سول اساں نال کھیڈدے نہیں ہوش سمبھالے۔
ہن دسو سنگ سہیلیؤ کوئی چلسو نالے۔7۔

اٹھویں نوں ہتھ ڈالیا میں تاں ہو دیوانی۔
جویں مثل کباب ہے مچھلی بن پانی۔
دکھ درد اولے آن کے ہن لہو پیندے۔
برہوں دی دوکان تے ساڈے گھاڑ گھڑیندے۔8۔

ناویں نوں چا کھوہلا دن رہندے تھوڑھے۔
میں پونی کتّ نہ جاتیا اجے رہندے گوہڑے۔
میں ترلے لیندی ڈگ پئی کوئی ڈھو نہ ہویا۔
غفلت گھر اجاڑیا اگوں کھیڈ وگویا۔9۔

دسویں گنڈھ جاں میں کھوہلی کیوں جمدی آہی۔
سبھ قبیلہ دیس تھیں دے ویس تراہیں۔
آمبڑ گھٹی دیندیئے جے زہر رلاویں۔
میں چھٹدی ایس عذابِ توں توں جند چھڈاویں۔10۔

یاہراں گنڈھیں کھوہلیاں میں ہجرے ماری۔
گئیاں سئیاں ساہورے ہن میری واری۔
بانہہ سراہنے دے کدی اسیں مول نہ ساؤندے۔
پھٹاں اتے لون ہے پھٹّ سمدے لاؤندے۔11۔

گنڈھ کھوہلی میں باہرویں کی ہوگ تماشہ۔
جس لاگی تس پیڑ ہے جگّ جانے ہاسہ۔
اک گئے نہ باہڑے جت جت کے ہردی۔
انہیں اکھیں ویکھیا ہوئِ خاک قبر دی۔12۔

تیرھاں گنڈھیں کھوہلیاں نین لہو روندے۔
ہویا ساتھ اتاولا دھوبی کپڑے دھوندے۔
سجن چادر تان کے سویا وچ حجرے۔
اجے بھی نہ اوہ جاگیا جگّ کتنے گزرے۔13۔

چودھاں گنڈھیں کھوہلیاں لہو پینا کھانا۔
جن راہاں وچ دھاڑوی تنھیں راہیں جانا۔
لگی چوٹ فراق دی دے کون دلاسہ۔
سخت مصیبت عشقَ دی رتّ رہی نہ ماسہ۔14۔

پندراں پنے روز نے کراں نعرے آہیں۔
شہر کھموشاں جاونا خاموش ہو جائیں۔15۔

سولاں گنڈھیں کھوہلیاں میں ہوئی نمانی۔
ایتھے پیش کسے نہ جاسیا نہ اگے جانی۔
ایتھے آون کیہا اے ہویا جوگی دا پھیرا۔
اگے جا کے مارنا وچ کلر ڈیرہ۔16۔

ستاراں گنڈھیں کھوہلیاں سولاں دے ہاڑی۔
مویاں نوں دکھ ماردا پھڑ ظلم کٹاری۔
تن-ہولاں سولاں ویریاں رنگ جیوں پھلّ توری۔
آئے ایس جہان تے ایہو کیتی چوری۔17۔

کھوہلاں گنڈھ اٹھارویں دل کرکے راضی۔
ایہہ چار دناں دی کھیڈ ہے ہجرے دی بازی۔
جنہاں ایہہ فراق ہے اوہ ونہدے مردے۔
نقارے وجن کوچ دے میں سر پر بردے۔18۔

انی گنڈھیں کھوہلیاں میں سول پسارا۔
ہن ایہہ دیس بداریا ویکھ حالَ ہمارا۔
کنی بھینی چاچیاں اٹھ کولوں گئیاں۔
کوئی دسّ نہ پاؤندا اوہ کیں ولّ گئیاں۔19۔

ویہہ گنڈھیں پھول کھولھیاں ہن کت ولّ بھاگوں۔
لگی چیٹک اور ہے سوؤں نہ جاگوں۔
پنج مہمان سر اتے سو پنجے باقی۔
جس مصیبت ایہہ بنی تس بخت پھراکی۔20۔

اکی کھوہلوں کیوں نہیں میرے مگر پیادے۔
تیل چڑھایا سوز دا اساں ہور تکادے۔
جیون جینا ساڑدا مایہ منہ پائے۔
ایسی پنی ویکھ کے اداسی آئے۔21۔

بائی کھوہلوں پہنچ کے سبھ میراں-ملکاں۔
اوہناں ڈیرہ کوچ ہے میں کھوہلاں پلکاں۔
اپنا رہنا کی کراں کہڑے باغ دی مولی۔
خالی جگ وچ آئکے سفنے پر بھولی۔22۔

تیئی جے کہوں کھوہلیاں وچ آپ سمانا۔
ہتھوں سٹاں ٹور کے کویں ویکھ پچھانا۔
الٹی پھاہی پے گئی دوجا ساتھ پکارے۔
پرزے پرزے میں ہوئی دل پارے پارے۔23۔

چوی کھوہلوں کھولھدی چک پون نبیڑے۔
سہم جنہاں دے ماریاں سوئی آئے نیڑے۔
تیور ہور نہ ہویا نہ زیور نہ گہنے۔
طعنے دینے دیوراں چپّ کیتیاں سہنے۔24۔

میں کھولھاں گنڈھ پچیسویں دکھاں ول میلاں۔
ہنجھوآں دی گل ہارنی اساں درد ہمیلاں۔
وٹنا ملیا سوز دا تلخ ترش سیاپے۔
نال دوہاں دے چلنا بن آیا جاپے۔25۔

چھبیں گنڈھیں امام ہے کدی پھیرا پایا۔
عمر توشہ پنج روز ہے سو لیکھے آیا۔
پیالے آئے موت دے ایہہ سبھ نے پینے۔
ایہہ دکھ اساڈے نال ہے سہو جیو کمینے۔26۔

ستائی کھولھ سہیلیؤ سبھ جتن سدھایا۔
دو نیناں نے روندیاں مینہہ ساون لایا۔
اک اک سائت دکھ دی سو جتن گزاری۔
اگے جانا دور ہے سر گٹھڑی بھاری۔27۔

اٹھائی گنڈھیں کھولھیاں نہیں عقل اساتھی۔
سختی آئی زور دی دھر چشمہ ماتھی۔
سکھاں توں ٹوٹی آ گئی دکھاں توں لاہی۔
بیچاری بےحال ہاں وچ سوز کڑاہی۔28۔

انتی گنڈھیں کھولھیاں نہیں سختی ہٹدی۔
لگا سینے بان ہے سر والاں پٹدی۔
ات ول پھیرا پائکے ایہہ حاصل آیا۔
تن تلواریں توڑیا اک روپ اڈایا۔29۔

کھولھی گنڈھ میں تیسویں دکھ درد رنجانی۔
کدی سروں نہ مکدی ایہہ رام کہانی۔
مڑ مڑ پھیر نہ جیونا نہ تن چھپدا لکدا۔
برہوں اجے خیال ہے ایہہ سر تے ڈھکدا۔30۔

اک اک گنڈھ نوں کھوہلیاں اکتی ہوئیاں۔
میں کس دی پانیہار ہاں ایتھے کیتیاں روئیاں۔
میں وچ چتر کھڈار ساں داء پیا نہ کاری۔
بازی کھیڈاں جت پر میں ایتھے ہاری۔31۔

بتی گنڈھاں کھولھیاں جو کھولھی بندی۔
اٹی اک اٹیر کے پھراں تانا تندی۔
تانا ہویا پرانا ہن کیکر لاہواں۔
کہوں کھٹو نہ باوری کتھوں لیساں لاواں۔32۔

بہہ پرچھاویں کھولھیاں ہن ہوئیاں تیتی۔
ایتھے دو تنّ روز ہاں پھر سہریاں سیتی۔
رنگن چڑھی رسول دی سبھ داج رنناوے۔
جس دے متھے بھاگ ہے اوہ رنگ گھر جاوے۔33۔

چوتیں گنڈھیں کھولھیاں دن آئے نیڑے۔
ماہی دے ول جاوساں رؤں کیتے کہڑے۔
اوڑک ویلا جان کے میں نیہں لگایا۔
اس تن ہونا خاک سی میں جا اڈایا۔34۔

بلھا پینتی کھولھدی شہہ نیڑے آئے۔
بدلے ایس عذابِ دے متّ مکھ دکھلائے۔
اگے تھوڑھی پیڑ سی نیہں کیتا دیوانی۔
پی گلی اساڈی آ وڑے تاں ہوگ اسانی۔35۔

چھتی کھوہلوں ہسّ کے نال امر ایمانی۔
سکھاں گھاٹا ڈالیا دکھاں تولانی۔
گھلی وا پریم دی مرنے پر مرنے۔
ٹونے کامن میت نوں اجے رہندے کرنے۔36۔

سینتی گنڈھیں کھولھیاں میں مہندی لائی۔
ملائم دیہی میں کراں مت گلے لگائی۔
اہا گھڑی سلکھنی جاں میں ولّ آوے۔
تاں میں گاواں سوہلے جے مینوں راوے۔37۔

اٹھتی گنڈھیں کھولھیاں کی کرنے لیکھے۔
نہ ہووے کاج سہاونا بن تیرے ویکھے۔
تیرا بھیت سہاگ ہے میں اس کہ کرساں۔
لیساں گلے لگائکے پر مول نہ ڈرساں۔38۔

انتالی گنڈھیں کھولھیاں سبھ سئیاں رل کے۔
عنایت سیج تے آوسی ہن میں ول پھلّ کے۔
چوڑا باہیں سر دھڑی ہتھ سوہے کنگنا۔
رنگن چڑھی شہہ وصل دی میں من تن رنگنا۔39۔

کر بسم اﷲ کھولھیاں میں گنڈھاں چالی۔
جس اپنا آپ ونجایا سو سرجن والی۔

جنج سونہنی میں بھاؤندی لٹکیندا آوے۔
جس نوں عشقَ ہے لال دا سو لال ہو جاوے۔
عقل فکر سبھ چھوڑ کے شہہ نال سدھائے۔
بن کہنوں گلّ غیر دی اساں یاد نہ کائے۔

ہن ان اﷲ آکھ کے تم کرو دوائیں۔
پیا ہی سبھ ہو گیا عبدالله ناہیں۔40۔