چرکھا نامہ کالیداس گجرانوالیا
چرکھا نامہ
کت چرکھا بھاگے بھریئے نی
وچوں دور دوئی نوں کریئے نی
جے جینودیاں چا مریئے نی
مڑ مرنا بارمبار نہیں
کت چرکھا ہمت ہار نہیں
ستگور نوں منوں وسار نہیں
اٹھ جاگ بڑا دن چڑھیا نی
توں ہتھا ہتھ نہ پھڑیا نی
نہیں نام سائیں دا پڑھیا نی
بن پڑھیاں پار اتار نہیں
کت چرکھا ہمت ہار نہیں
دلبر نوں دلوں وسار نہیں
توں داج بنا لے سارا نی
گل لاسی کنت پیارا نی
جو روپ ریکھ توں نیارا نی
کوئی جسدا پاراوار نہیں
کت چرکھا ہمت ہار نہیں
دلبر نوں دلوں وسار نہیں
توں پریت لگائی کچی نی
میں گھولی میریئے بچی نی
میں جھوٹھی تے توں سچی نی
ہن سچا منوں وسار نہیں
کت چرکھا ہمت ہار نہیں
دلبر نوں دلوں وسار نہیں
کسے گھڑیا کاریگر دا نی
پیا شبد جو انحد کردا نی
جاں حرف حقیقی پڑھدا نی
کجھ علف اگے درکار نہیں
کت چرکھا ہمت ہار نہیں
دلبر نوں دلوں وسار نہیں
ایہہ چرکھا عجب رنگیلا نی
رنگ رتا ساوا پیلا نی
کوئی سبز سوسنی نیلا نی
رنگاں دا انت شمار نہیں
کت چرکھا ہمت ہار نہیں
دلبر نوں دلوں وسار نہیں
نھیوں نال پیا دے رکھ کڑے
مت ویکھیں میلی اکھ کڑے
کر دیئی لکھوں ککھّ کڑے
مڑ ککھوں لکھ ہزار نہیں
کت چرکھا ہمت ہار نہیں
دلبر نوں دلوں وسار نہیں
توں جس دن چھوپے پانی ایں
صد کڑیاں چرکھا ڈانھیئیں
وچّ نیندر دے ہنگلانی ایں
سر تیرے پہریدار نہیں
کت چرکھا ہمت ہار نہیں
دلبر نوں دلوں وسار نہیں
ایہہ چرکھا بنیا چنن دا
نہ کریں ارادا بھنن دا
کجھ کر لے کنیں بنھن دا
تینوں اگے ملے ہدار نہیں
کت چرکھا ہمت ہار نہیں
دلبر نوں دلوں وسار نہیں
وچ چرخے پنجے تتّ کڑے
تینوں پنجے دیندے متّ کڑے
پنجاں دا پیر نہ گھتّ کڑے
کر کام کرودھ ہنکار نہیں
کت چرکھا ہمت ہار نہیں
دلبر نوں دلوں وسار نہیں
ایہہ ترکلا من دیاں آساں دا
تے بائڑ نکّ منہ ناساں دا
وچ ڈورا پیا سواساں دا
جس پھرنے باجھ وہار نہیں
کت چرکھا ہمت ہار نہیں
دلبر نوں دلوں وسار نہیں
ایہہ چرکھا بنیاں تن دا نی
وچ منکا پایا من دا نی
بھؤ لکھ چوراسی بندا نی
جے بنیا وقت گزار نہیں
کت چرکھا ہمت ہار نہیں
دلبر نوں دلوں وسار نہیں
ایہہ چمڑی چمڑی مایہ ہے
جس سارا جگ بھرمایا ہے
اس مایہ مار مکایا ہے
کون اسدے توں بے زار نہیں
کت چرکھا ہمت ہار نہیں
دلبر نوں دلوں وسار نہیں
چڑھ ڈولی جے من ڈولیگا
نہ کنت پیارا بولیگا
دھر جدوں ترازو تولیگا
مڑ ککھاں جناں بھار نہیں
کت چرکھا ہمت ہار نہیں
دلبر نوں دلوں وسار نہیں
جد آسن چار قہار کڑے
تد روسیں چیکاں مار کڑے
سبھ کڈھن دھکے مار کڑے
کوئی ایہہ تیرا گھر باہر نہیں
کت چرکھا ہمت ہار نہیں
دلبر نوں دلوں وسار نہیں
چھڈّ دیسن لاڈ لڈکی دا
نہ دیسن آٹا ٹکی دا
جے پکڑ لیں لڑ اکی دا
مڑ دوجا کرے خوار نہیں
کت چرکھا ہمت ہار نہیں
دلبر نوں دلوں وسار نہیں
تیرے چرخے نوں گھن لگا نی
رنگ ہویا ساوا بگا نی
سڑ جائی چنی جھگا نی
توں اگا لیا سوار نہیں
کت چرکھا ہمت ہار نہیں
دلبر نوں دلوں وسار نہیں
نہ خدی تکبر ٹیں گئی
مر گئی نہ وچوں میں گئی
رڑھ سوہنی وانگر نیں گئی
پھڑ کسے لنگھائی پار نہیں
کت چرکھا ہمت ہار نہیں
دلبر نوں دلوں وسار نہیں
نہ کتی ہتھلی پونی نی
سڑ جائے تیری کونی نی
تینوں حرص دنو دن دونی نی
چت چھڈدا وشے وکار نہیں
کت چرکھا ہمت ہار نہیں
دلبر نوں دلوں وسار نہیں
توں جو کجھ پینی کھانی ایں
وچ ہوما اگن کھپانی ایں
سبھ اؤتر کردی جانی ایں
تینوں ہندا نام ادھار نہیں
کت چرکھا ہمت ہار نہیں
دلبر نوں دلوں وسار نہیں
نہ گورو نہ رہسی چیلا نی
جگ چار دناں دا میلہ نی
چل جاسی بھور اکیلا نی
توں لمی کھیڈ کھلار نی
کت چرکھا ہمت ہار نہیں
دلبر نوں دلوں وسار نہیں
توں گہنا کپڑا پانی ایں
سبھ ہار سنگار لگانی ایں
پھلاں دی سیج وچھانی ایں
پر کنتا کردا پیار نہیں
کت چرکھا ہمت ہار نہیں
دلبر نوں دلوں وسار نہیں
جیہڑی سبھ توں بھکھی ننگی ہے
پر صاحب دے رنگ رنگی ہے
اوہ سبھسے نالوں چنگی ہے
گھر اسدے نند وچار نہیں
کت چرکھا ہمت ہار نہیں
دلبر نوں دلوں وسار نہیں
توں چھڈّ دے بھیڑی عادت نی
کر اٹھے پہر عبادت نی
سبھ اگے بھرن شہادت نی
کوئی ایسی نیکو کار نہیں
کت چرکھا ہمت ہار نہیں
دلبر نوں دلوں وسار نہیں
جد گزرنگے دن اٹھ کڑے
بھج پیسی چرخے لٹھّ کڑے
توں نہ کر ایڈا ہٹھّ کڑے
مڑ گھڑنا استاکار نہیں
کت چرکھا ہمت ہار نہیں
دلبر نوں دلوں وسار نہیں
تینوں پھوکن دبن ساڑنگے
جاں چک چکھا تے چاڑھنگے
جاں شیر بگھیلے پاڑنگے
کوئی ایس گلّ دا اعتبار نہیں
کت چرکھا ہمت ہار نہیں
دلبر نوں دلوں وسار نہیں
اس دم دا کی بھروسہ نی
سبھ جھوٹھی پوشا پوشا نی
کجھ کر اگے دا توشہ نی
کوئی اگے شاہوکار نہیں
کت چرکھا ہمت ہار نہیں
دلبر نوں دلوں وسار نہیں
سو سبھ سے توں وڈ بھاگن نی
جس پگڑی دست براگن نی
کم کیتا سوون جاگن نی
اس جیسی کو ہشیار نہیں
کت چرکھا ہمت ہار نہیں
دلبر نوں دلوں وسار نہیں
توں اک نہ چھتھا گوڑھا نی
ہن شام پئی دن تھوڑھا نی
کر بیٹھا شام اجوڑا نی
تیرا ثابت قول قرار نہیں
کت چرکھا ہمت ہار نہیں
دلبر نوں دلوں وسار نہیں
سڑ جانی کڑیاں کننن نی
ایہہ چوڑے تے چھنکننن نی
نہ چڑھی پریم دی رننن نی
دل تینوں بھورا آر نہیں
کت چرکھا ہمت ہار نہیں
دلبر نوں دلوں وسار نہیں
نہ جاتوئی ربّ ٹھیک کڑے
جو شاہ رگ توں نزدیک کڑے
ایہہ نقطہ بہت بریک کڑے
توں سمجھیں اسدی تار نہیں
کت چرکھا ہمت ہار نہیں
دلبر نوں دلوں وسار نہیں
جد موت سرے تے آئی نی
سبھ بھلّ گئی چترائی نی
تینوں روسن بھیناں بھائی نی
توں دینا پھیر دیدار نہیں
کت چرکھا ہمت ہار نہیں
دلبر نوں دلوں وسار نہیں
تینوں کتن دا نہیں قاعدہ نی
چرخے دی رمز علیحدہ نی
گئی ساری عمر بے فائدہ نی
توں وعدہ اپنا ہار نہیں
کت چرکھا ہمت ہار نہیں
دلبر نوں دلوں وسار نہیں
توں عمل نہ کیتے چنگے نی
دل پاپاں کولوں سنگے نی
شاہ لیکھا جد کد منگے نی
نکلنگے پیسے چار نہیں
کت چرکھا ہمت ہار نہیں
دلبر نوں دلوں وسار نہیں
جد کرسن ماپے کاج کڑے
جنگل دا دیسن راج کڑے
اک چولی چنی داج کڑے
توں اس گلّ تے دم مار نہیں
کت چرکھا ہمت ہار نہیں
دلبر نوں دلوں وسار نہیں
کیوں کرنیئیں میری میری
کد تک رہے حیاتی تیری
ساڈھے ترے ہتھ زمیں بتیری
توں ایڈے پیر پسار نہیں
کت چرکھا ہمت ہار نہیں
دلبر نوں دلوں وسار نہیں
ایہہ سوہے سبز دپٹے نی
رل جاسن اک دن گھٹے نی
اس خدی کئی گھر پٹے نی
توں ایڈا کر ہنکار نہیں
کت چرکھا ہمت ہار نہیں
دلبر نوں دلوں وسار نہیں
جد وشن سہنسر نام ہویا
گھٹ گھٹ میں رامو رام ہویا
جیہِ سمرے پورن کام ہویا
اس کام بنا کچھ کار نہیں
کت چرکھا ہمت ہار نہیں
دلبر نوں دلوں وسار نہیں
نت آکھے کالی داس کڑے
توں رہو چرناں دے پاس کڑے
تیرے جان سکھلے ساس کڑے
بن صاحب بخشنہار نہیں
کت چرکھا ہمت ہار نہیں
دلبر نوں دلوں وسار نہیں
