Rajdeep Singh Toor
ਰਾਜਦੀਪ ਸਿੰਘ ਤੂਰ

ਲੁਧਿਆਣੇ ਜ਼ਿਲ੍ਹੇ ਦੇ ਪਿੰਡ ਸਵੱਦੀ ਕਲਾਂ ਦੇ ਜੰਮਪਲ ਰਾਜਦੀਪ ਸਿੰਘ ਤੂਰ ਨੂੰ ਲਿਖਣ ਸ਼ਕਤੀ ਵਿਰਸੇ ’ਚ ਮਿਲੀ ਹੋਈ ਹੈ । ਉਸਦੇ ਪਿਤਾ ਜੀ ਸ: ਰਾਜਿੰਦਰ ਸਿੰਘ ਰਾਜ਼ ਸਵੱਦੀ ਆਪਣੇ ਸਮੇਂ ਦੇ ਵਧੀਆ ਕਹਾਣੀ ਲੇਖਕ ਸਨ । ਇਕਹਿਰੇ ਸਰੀਰ ਦੇ ਇਸ ਮਿੱਠ ਬੋਲੜੇ ਨੌਜਵਾਨ ਨੇ ਥੋੜੇ ਸਮੇਂ ਵਿੱਚ ਹੀ ਸਾਹਿਤ ਸਭਾ ਜਗਰਾਓਂ ਦੇ ਹਰ ਮੈਂਬਰ ਦੇ ਦਿਲ ਅੰਦਰ ਆਪਣੀ ਵਿਸ਼ੇਸ਼ ਤੇ ਜ਼ਿਕਰਯੋਗ ਥਾਂ ਬਣਾ ਲਈ ਹੈ।

ਬਹੁਤੇ ਲੇਖਕਾਂ ਦੀ ਲੇਖਣੀ ਤੇ ਅਸਲ ਜ਼ਿੰਦਗੀ ’ਚ ਢੇਰ ਅੰਤਰ ਵੇਖਣ ਨੂੰ ਮਿਲ ਜਾਂਦੇ ਨੇ ਪਰ ਰਾਜਦੀਪ ਨਾਲ ਵਿਚਰਦਿਆਂ ਤੁਸੀਂ ਬੜੀ ਸ਼ਿੱਦਤ ਨਾਲ ਮਹਿਸੂਸ ਕਰ ਸਕਦੇ ਹੋ ਕਿ ਉਸਦੇ ਸ਼ਿਅਰਾਂ ਵਿਚਲੀ ਸੰਵੇਦਨਾ, ਗਹਿਰਾਈ ਤੇ ਨਿਆਰਾਪਣ ਕਿਧਰੇ ਉਸਦੀ ਆਪਣੀ ਸਖਸ਼ੀਅਤ ਵਿੱਚੋਂ ਦੀ ਕਸ਼ੀਦ ਕੇ ਆਉਂਦਾ ਹੈ । ਸਧਾਰਨ ਮਨੁੱਖ ਦੀਆਂ ਥੁੜਾਂ, ਪੀੜਾਂ, ਮਜਬੂਰੀਆਂ, ਹਟਕੋਰਿਆਂ ਅਤੇ ਨਿਹੋਰਿਆਂ ਨੂੰ ਹੂ-ਬ-ਹੂ ਸ਼ਿਅਰਾਂ ’ਚ ਢਾਲ ਦੇਣਾ ਤੂਰ ਦੀ ਖੂਬੀ ਹੈ । ਮੁਹੱਬਤ ਦੀ ਗ਼ਜ਼ਲ ਕਹਿੰਦਿਆਂ ਉਹ ਪਿਆਰ ’ਚ ਭਿੱਜਿਆ ਪਪੀਹਾ ਜਾਪਦਾ ਹੈ ਅਤੇ ਲੋਕ ਸਰੋਕਾਰਾਂ ਦੀ ਬਾਤ ਪਾਉਂਦਿਆਂ ਇੱਕ ਬੇਹੱਦ ਸਜੱਗ, ਚੇਤੰਨ ਅਤੇ ਪ੍ਰਤੀਬੱਧ ਸ਼ਾਇਰ ਹੋ ਨਿੱਬੜਦਾ ਹੈ ।-ਪ੍ਰਭਜੋਤ ਸਿੰਘ ਸੋਹੀ